MOE: შეხვედრა ბუნებრივ კატასტროფებზე

http://moe.gov.ge/index.php?lang_id=G... გარემოს დაცვის სამინისტროს ორგანიზებით თბილისმა ბუნებრივი კატასტროფების შესახებ რეგიონულ შეხვედრას უმასპინძლა, რომელიც მინისტრის პირველმა მოადგილემ გოჩა მამაცაშვილმა გახსნა. შეხვედრა „პარტნიორობა გარემოს დაცვისა და ბუნებრივი კატასტროფების რისკის შესამცირებლად" (PEDRR) თანამშრომლობით გაიმართა და მისი მთავარი თემა იყო „ეკოსისტემაზე დაფუძნებული კატასტროფების რისკის შემცირება მდგრადი განვითარებისათვის". სემინარში ევროსაბჭოს, გაეროს, საქართველოს, სომხეთისა და აზერბაიჯანის გარემოს დაცვის სამინისტროების წარმომადგენლები მონაწილეობდნენ და კავკასიის რეგიონის სპეციფიკის შესახებ მსჯელობდნენ. მონაწილე მხარეებმა მიმდინარე წლის განმავლობაში საჭიროებათა შეფასება მოახდინეს. საქართველო აქტიურად არის ჩართული მსოფლიო კლიმატის ცვლილების სადააპტაციო და ბუნებრივი კატასტროფების რისკის შემცირების პროგრამებში. ამ მიმართულებით ქვეყანაში რამდენიმე საერთაშორისო პროექტი მიმდინარეობს. სამუშაო შეხვედრის მიზანი იყო კატასტროფათა რისკის შემცირების და მდგრადი განვითარებისაკენ მიმართული ეკოსისტემური სერვისების გამოყენებით მიღებული სასარგებლო შედეგების შესახებ ცნობიერების ამაღლება, ეკოსისტემების მართვის გაძლიერება და რეგიონული თანამშრომლობის გაუმჯობესება ეკოსისტემების მართვის, კატასტროფათა რისკის შემცირების, კლიმატის ცვლილების ადაპტაციისა და განვითარების სექტორში.