ინფიცირების რეკორდული მაჩვენებლები და გარდაცვლილთა მაღალი სტატისტიკა ❗ოცნების წარუმატებელი პოლიტიკა

ქვეყანაში ეპიდაფეთქების პიკია.  ყოველდღიური ინფიცირების მაღალი მაჩვენებლის შედეგად გადატვირთულია, სამედიცინო დაწესებულებები. კოვიდინფცირებულ პაციენტებს კლინიკის დერეფანში მკურნალობენ. პრობლემაა პირველადი ჯანდაცვის სისტემაშიც. ეპიდემიოლოგები ამბობენ, რომ ახლა მოვლენები ყველაზე ცუდი სცენარით ვითარდება. რა შეფასებები აქვთ  არსებული  ვითარების ფონზე ექიმებს და რა რეკომნედაციებს გასცემენ ისინი. ეს კადრები ბათუმის ერთ-ერთ სამედიცინო დაწესებულებაშია გადაღებული. ფოტოებიდან ირკვევა, რომ კოვიდპაციენტებს, პალატების ნაცვლად, დერეფანში მკურნალობენ. ანუ გამოდის, რომ ჯანდაცვის სისტემა გადატვირთულია და ინფიცირებულთათვის საჭირო საწოლფონდის მარაგიც თითქმის ამოწურულია. მიუხედავად არსებული რეალობისა, აჭარის საზოგადოებრივი ჯანდაცვის ცენტრში გვიმტკიცებენ, რომ რეგონში, საწოლების დეფიციტი არ არის. ნონა ეფაძის განმარტებით, სამინისტრო ეპიდსიტუაციის სამართავად ძალებს არ იშურებს. იგი შექმნილ მძიმე მდგომარეობას, მოქალაქეების მხრიდან რეგულაციების უგულებელყოფას უკავშირებს. ნონა ეფაძის პოზიციას იზიარებს სოფიო ბერიძეც. ექიმი-თერაპევტის განმარტებით, თუ კი მოქალაქეები პასუხისმგებლობას არ გაიაზრებენ და რეგულაციებს სათანადოდ არ დაიცავენ, ჯანდაცვის სექტორი უძლური იქნება. მედიკოსის შეფასებით, ახლა ეპიდაფეთქების პიკში ვართ და დრამატული სცენარია მოსალოდნელი. მისივე პროგნოზით, შესაძლოა დღის განმავლობაში გარდაცვლილთა სამნიშნა რიცხვები მივიღოთ. სპეციალისტი ადგილობრივებს სახლში დარჩენისკენ მოუწოდებს. ჯანდაცვის სისტემა რომ კოლაფსისკენ მიდის, ამაზე გადატვირთული სამედიცინო დაწესებულებები, ინფიცირების რეკორდული მაჩვენებლები და გარდაცვლილთა მაღალი სტატისტიკაც მოწმობს. ლევან ანთაძეს მიაჩნია, რომ ხელისუფლება, მიღებული გამოცდილების მიუხედავად, ამ რეალობისთვის სათანადოდ ვერ მოემზადა. მისი განმარტებით, ზაფხულის სეზონზე, ინფიცირების მზარდი შემთხევევები მოსალოდნელი იყო, თუმცა პრევენციისთვის საჭირო ღონისძიებები არ გატარდა. ანთაძის პოზიცით, ერთადერთი, რაც ამ რთული ვითარებიდან გამოგვიყვანს, მასობრივი იმუნიზაციაა. საქართველოში კოვიდვითარება რომ საგანგაშოა, ამას ჯანდაცვის მინისტრიც ადასტურებს. ეკატერინე ტიკარაძის განცხადებით, მოვლენები ყველაზე ცუდი სცენარით ახლა, მეოთხე ტალღის დროს ვითარდება. მინისტრი ყურადღებას სამედიცინო რესურსის ამოწურვის საშიშროებაზე ამახვილებს. საქართველოში კორონავირუსის „დელტა“ შტამი ფართოდ ვრცელდება, ყოველდღიურად იზრდება ინფიცირებისა და გარდაცვალების შემთხვევებიც. ექიმები მოქალაქეებს მოუწოდებენ, დაიცვან სოციალური დისტანცია, ატარონ პირბადე და აქტიურად ჩაეთონ იმუნიზაციიის პროცესში. #ლევან_ანთაძე