ზუგდიდში მოშიმშილე დევნილები მერაბ ქვარაიას პირობის შესრულებას ელოდებიან

იძულებით გადაადგილებული პირები, რომლებიც, ორ კვირაზე მეტია, შიმშილობენ, დღეს სახელმწიფო კომისიის მისვლას ელოდებიან. მათი თქმით, იმ შემთხვევაში, თუ კომისია დღესვე ხელახლა არ გადაამოწმებს მათ საცხოვრებელ პირობებს, ისინი უკიდურეს ზომებს მიმართავენ. „ვურეკავთ ბატონ მანუჩარს, ტელეფონიც კი გამორთო. არანაირ პასუხს არ გვაძლევს დევნილეთა სამინისტრო, არც ადგილობრივი სამმართველო...ველოდებით მერაბ ქვარაიას პირობას, რომ დღეს უნდა ჩამოსულიყო კომისია, თუმცა ჯერ არავინ მოსულა. დღესაც თუ არაფერი იქნა, ასე არ გავჩერდებით... ნუ დაძაბავენ სიტუაციას ისე, რომ ჩიხში შევიდეს ყველაფერი“, - თქვა ერთ-ერთმა მოშიმშილემ ტარიელ ქობალიამ. ზუგდიდში მოშიმშილე დევნილებთან ქალაქის მაჟორიტარი დეპუტატი მერაბ ქვარაია 7 თებერვალს მივიდა და მათ პრობლემებს ადგილზე გაეცნო. ის აქციის მონაწილეებს დახმარებას დაჰპირდა. აფხაზეთიდან იძულებით გადაადგილებულები ჩასახლების ეზოში სახელდახელოდ აგებულ კარავში, დაახლოებით, ორი კვირაა, შიმშილობენ. ისინი მათთვის მინიჭებული ქულების გადამოწმებას და საცხოვრებელი ფართებით უზრუნველყოფას ითხოვენ. თავის მხრივ, დევნილთა სამინისტროში აცხადებენ, რომ მინიჭებული ქულების გადამოწმება არ იგეგმება. დევნილების ინფორმაციით, საავადმყოფოს ყოფილ შენობაში 58 ოჯახი, ათეულობით წელია, გაუსაძლის პირობებში ცხოვრობს. რადიო "ათინათი" Website: http://radioatinati.ge/ Facebook:   / rado.atinati.  . Google+: https://plus.google.com/u/0/116211701... Twitter: https://twitter.com/