MOE: მავნებლებთან ბრძოლის ღონისძიებების შესახებ ბრიფინგი გაიმართა

http://moe.gov.ge/index.php?lang_id=G... საქართველოს გარემოსა და ბუნებრივი რესურსების დაცვის სამინისტროში გარემოსა და ბუნებრივი რესურსების დაცვის მინისტრმა ხათუნა გოგალაძემ და ეროვნული სატყეო სააგენტოს უფროსმა ბიძინა გიორგობიანმა ავიაციის მეშვეობით მავნებლებთან ბრძოლის ღონისძიებების შესახებ ბრიფინგი გამართეს. ხათუნა გოგალაძის განცხადებით, თბილისის ირგვლივ არსებულ ტყით დაფარულ ფართობზე, ავიაციის დახმარებით, მავნებლებთან ბრძოლის ღონისძიებები გატარდება. აღსანიშნავია, რომ ავიაციით ტყეების დამუშავება, რომელიც 5-დან 15 მაისამდე დაიწყება, ბოლო 30 წლის განმავლობაში არ განხორციელებულა. შეწამვლა დილით, მზის ამოსვლამდე, ასევე საღამოს საათებში მოხდება და პროცესი სპეციალისტების ზედამხედველობით წარიმართება. ფოთლის მღრღნელი მავნებლების: ცქვლეფია მზომელა, მოზამთრე მზომელა, ოქროკუდა, ფოთლის ხერხია, მწვანე მატლები და სხვა მავნე მწერების მასობრივი გავრცელება 2013 წლის მაისში თბილისის შემოგარენში (წყნეთი, ახალდაბა, ბირთვისი, ბეთანია, კოჯორი, თეთრიწყაროს საზღვარი, ბირთვისი, მცხეთა-დიდგორი) ფოთლოვან სახეობებზე (მუხნარ-რცხილნარი, კუნელი და სხვა) გამოვლინდა. აღნიშნულ ტერიტორიებზე ჩატარდა რეკოგნოსცირებული გამოკვლევა და დაზუსტდა მავნებლის გავრცელებისა და მაღალი რისკის მქონე ფართობები.