MOE: საქართველოში ნარჩენების მართვის ეროვნული სტრატეგიის გეგმის შემუშავება დაიწყო

http://moe.gov.ge/index.php?lang_id=G... საქართველოს გარემოსა და ბუნებრივი რესურსების დაცვის სამინისტროში გაიმართა ნარჩენების მართვის კანონპროექტით გათვალისწინებული ნარჩენების მართვის პირველი ეროვნული სტრატეგიული გეგმისა და საქართველოში ნარჩენების მართვის სისტემის განვითარების სტრატეგიული პრინციპების პრეზენტაცია. ღონისძიებაში მონაწილეობდნენ საქართველოს გარემოსა და ბუნებრივი რესურსების დაცვის მინისტრის პირველი მოადგილე ნინო შარაშიძე, სამთავრობო და არასამთავრობო სექტორის და მუნიციპალიტეტების წარმომადგენლები. 5 წლიანი გეგმა, გრძელვადიანი სტრატეგია და მუნიციპალური ნარჩენების რეგიონული მართვის კონცეფცია შემუშავდა ევროკავშირის მიერ დაფინანსებული თვინინგის პროექტის „გარემოს დაცვის სამინისტროს შესაძლებლობათა გაძლიერება ნარჩენების მართვის სისტემის შემუშავებისა და გაუმჯობესების მიზნით საქართველოში" ფარგლებში. სტრატეგიაში გამოიკვეთა ნარჩენების მართვის ახალი სისტემის მთავარი პრიორიტეტები: • ნარჩენების შეგროვების არსებული სისტემის გაუმჯობესება • სეპარირებული შეგროვება და რეციკლირება • სტანდარტებთან შეუსაბამო ნაგავსაყრელების დახურვა და რემედიაცია • ახალი ნაგავსაყრელების მშენებლობა შეხვედრაზე წარმოდგენილ იქნა მუნიციპალური ნარჩენების რეგიონულ დონეზე მართვის სხვადასხვა ვარიანტები და ასევე, რამდენიმე მუნიციპალიტეტის მიერ ნარჩენების ერთობლივი შეგროვებისა და დამუშავების მიზნით გათვალისწინებული ღონისძიებები. ნარჩენების მართვის სტრატეგიული გეგმა მნიშვნელოვანია საქართველოსა და ევროკავშირს შორის ასოცირების შეთანხმების თაობაზე მოლაპარაკებების თვალსაზრისითაც; ასოცირების შეთანხმების ერთ-ერთ მთავარ მიზანს, სწორედ გარემოს დაცვა წარმოადგენს და ის მოიცავს კონკრეტულ ვალდებულებებს ნარჩენების მართვის სფეროში ევროპული პრაქტიკის დანერგვის თაობაზე.