obieqtivi კვირის მოვლენა событие недели Event of the Week 4

2012 წლის 08 ივლისი, 22:30 - 23:25 წამყვანი: კვიცარიძე ზაზა სტუმარი: დეპუტატი მამრაძე პეტრე -- წლების განმავლობაში, ვისაც სამთავრობო წრეებთან შეხება ჰქონდა, მათ შორის, უცხოელმა დიპლომატებმა და ექსპერტებმა, ყველამ იცოდა, რომ საქართველოში პრემიერ-მინისტრისა და პარლამენტის თავმჯდომარის ერთობლივი გავლენა და წონა გაცილებით ნაკლებია, ვიდრე მერაბიშვილის და თუნდაც მისი ზოგიერთი მოადგილის. დავით ბაქრაძე და ნიკა გილაური დეკორატიული ფიგურები იყვნენ და ძალაუფლება ვანო მერაბიშვილს გაცილებით მეტი ჰქონდა. მოსაზრება, თითქოს ბაჩო ახალაიას დანიშვნით მერაბიშვილის ძალაუფლება შესუსტდა, არაადეკვატურია და სიმართლეს არ შეესაბამება. მერაბიშვილის პრემიერ-მისნიტრად დანიშვნას მხოლოდ პიარ დატვირთვა აქვს. ეს ყმაწვილები ახლა სიცოცხლის შენარჩუნებისთვის იბრძვიან. თუ ძალაუფლება დაკარგეს, იციან, რომ უვადო პატიმრობა არ ასცდებათ. -- როდესაც ბიძინა ივანიშვილმა ოქტომბერში პოლიტიკაში მოსვლის გადაწყვეტილება მიიღო, ხელისუფლება დიდ პანიკაში ჩავარდა, განსაკუთრებით თბილისსა და რეგიონებში გამართული აქციების შემდეგ. თუ ხელისუფლებამ დაინახა, რომ აგებენ, ოქტომბრამდე რეპრესიებს ჩაატარებენ. დაიწყება ივანიშვლის მომხრე ლიდერების დაჭერები სახელმწიფო ღალატისა და კრემლის აგენტობის ბრალდებით. თუ არჩევნებზე „ნაციონალებმა" 65% დაიწერეს, რა თქმა უნდა, ხალხის ნაწილი გააპროტესტებს. თუ ეს პროტესტი მასობრივი იქნება, ისევ რეპრესიებზე წავლენ, თუმცა რა სცენარიც არ უნდა განხორციელდეს, „ნაციონალებს" დიდი დრო აღარ უწერიათ. -- ვანო მერაბიშვილს არ აქვს მოლაპარაკე ადამიანის იმიჯი. მისგან პოპულიზმი და დემაგოგია ბევრი არ ყოფილა. „ნაციონალებს" იმედი აქვთ, რომ ხალხის თვალში მერაბიშვილი არის ადამიანი, რომელიც მიჩვეულია მუშაობას ლაპარაკის ნაცვლად. ხელისუფლება არჩევნებამდე ხალხს შეღავათების ნიაღვარს გაუკეთებს. ამის რესურსი ნამდვილად აქვთ. თუმცა ხელისუფლებაში დარჩენის შემთხვევაში დახარჯულ თანხებს ათმაგად ამოიღებენ. მიხარია, რომ ხალხს ხელისუფლების დაპირებების აღარ სჯერა.