მეუფე გერასიმე პატრიარქის მესაყდრედ შიო მუჯირის დანიშვნაზე: არაფერი ვიცოდი

ზუგდიდისა და ცაიშის მიტროპოლიტმა მეუფე გერასიმემ პატრიარქის მესაყდრედ შიო მუჯირის დანიშვნის შესახებ მედიისგან ყულიშკარის წმინდა გიორგის სახელობის ტაძარში წირვის შემდეგ ჟურნალისტებისგან შეიტყო. „არ ვიცი, წირვაზე ვიყავით და ამის შესახებ ახლა თქვენგან, ჟურნალისტებისგან გავიგე. ღმერთმა ჯანმრთელად და ბედნიერად გვიმყოფოს ჩვენი პატრიარქი. წმინდა გიორგი შეეწიოს და გაახაროს. კიდევ მრავალ წელს იქნება ჩვენი პატრიარქი საქართველოს ეკლესიის საჭეთმპყროებელი“,- აღნიშნა მან. ქაშუეთში გიორგობის აღსანიშნავი სადღესასწაულო წირვის დაწყებამდე სრულიად საქართველოს კათოლიკოს-პატრიარქმა ბრძანება წაიკითხა, რომელის მიხედვითაც ილია მეორეს მესაყდრე სენაკისა და ჩხოროწყუს მიტროპოლიტი შიო მუჯირი იქნება. სრულიად საქართველოს კათოლიკოს-პატრიარქის გარდაცვალების, გადადგომის ან სხვა ისეთი მიზეზის გამო, რომელიც შეუძლებელს ხდის კათოლიკოს-პატრიარქისათვის თავისი მოვალეობების შესრულებას, კათოლიკოს-პატრიარქის მიერ დადგენილი საპატრიარქო ტახტის მოსაყდრე მართავს ეკლესიას ახალი კათოლიკოს-პატრიარქის არჩევამდე, – ამის შესახებ საქართველოს მართლმადიდებელი ეკლესიის დებულებაშია ნათქვამი, რომელიც საქართველოს მართლმადიდებელი ეკლესიის გაფართოებულმა საეკლესიო კრებამ 1995 წელს მიიღო. რადიო "ათინათი" Website: http://radioatinati.ge Facebook: https://www.facebook.com/Rado.ATINATI Google +: https://plus.google.com/u/0/116211701... Twitter: https://twitter.com/