,,არაღიარებული ძალადობა’’ - დისკუსია სიძულვილით მოტივირებულ დანაშაულებზე

ზუგდიდში ორგანიზაცია „ქალთა ინიციატივების მხარდამჭერმა ჯგუფმა'' (WISG) ანგარიში ,,არაღიარებული ძალადობა’’ წარადგინა. აღნიშნული დოკუმენტი 2016 წლის წარმოებული საქმეების, გაწეული ინდივიდუალური და ჯგუფური სამართლებრივი კონსულტაციების და სიძულვილით მოტივირებული დანაშაულებისა სტატისტიკასა და ანალიზს მოიცავს. შეხვედრაზე ითქვა, რომ გენდერული ნიშნით ძალადობის საკითხი სამეგრელოს რეგიონში აქტუალური და მნიშვნელოვანი პრობლემაა. ,,ანგარიშში, ორგანიზაციის მიერ წარმოებული საქმეების საფუძველზე, გაანალიზებულია სახელმწიფოს მხრიდან ქალთა მიმართ ძალადობისა და გენდერის ნიშნით ძალადობის ცალკეული ფორმების იდენტიფიცირებასა და რეაგირებასთან დაკავშირებული პრობლემები, როგორიცაა ლგბტი ადამიანების მიმართ ჩადენილი სიძულვილით მოტივირებული დანაშაულისა და ინციდენტების გამოძიება, ქალთა ან ლგბტი პირთა დისკრიმინაცია,’’- აღნიშნა ორგანიზაციის იურისტმა ქეთი ბახტაძემ. ,,ქალთა ინიციატივების მხარდამჭერ ჯგუფს'' საზოგაოებრივმა ორგანიზაციამ ,,თანასწორობის მოძრაობამ’’ უმასპინძლა. ,,მიუხედავად იმისა რომ სამართლებრივი მექანიზმები ამ კუთხით გვაქვს, ის მოუქნელია და საჭიროა მისი შეცვლა. მსგავსი დისკუსიები ემსახურება გენდერული ნიშნით ძალადობის საკითხის წამოწევას და პრობლემის გააქტუალურებას’’, - თქვა თანასწორობის მოძრაობის წევრმა ცაბუნია ვართაგავამ. შეხვედრას არასამთავრობო ორგანიზაციების წარმომადგენლები, სოციალური მუშაკები და აქტიური მოქალაქეები დაესწრნენ. რადიო "ათინათი" Website: http://radioatinati.ge/ Facebook:   / rado.atinati.  . Google+: https://plus.google.com/u/0/116211701... Twitter: https://twitter.com/