ომის 25-ე დღე უკრაინაში - ბოლო ცნობები

115-მდე გაიზარდა უკრაინაში დაღუპული ბავშვების რიცხვი. რუსეთის საოკუპაციო ძალების იერიშს ხარკოვში ცხრა წლის მოზარდი ემსხვერპლა. ამ დრომდე უცნობია, რა მდგომარეობაში არიან ის ბავშვები, ქალები და ხანდაზმულები, რომლებიც მარიუპოლში სკოლის შენობას აფარებდნენ თავს და ეს შენობა მარიუპოლის საქალაქო საბჭოს ინფორმაციით, რუსეთის ძალებმა დაბომბეს. სკოლის შენობაში დაახლოებით 400-მდე ადამიანი იმყოფებოდა. შენობა განადგურებულია და ხალხი ნანგრევებშია მოყოლილი. რუსული ძალების მიერ ალყაში მოქცეულ მარიუპოლში ამჟამად 300 ათასამდე მშვიდობიანი მოქალაქე იმყოფება. ისინი საკვების, წყლის და პირველადი საჭიროების ნივთების დეფიციტს განიცდიან. ქალაქში მძიმე ჰუმანიტარული ვითარებაა შექმნილი. ადგილობრივი ხელისუფლების ცნობით, რუსეთის ინტერვენციის დაწყებიდან მარიუპოლში 2 400-ზე მეტი მშვიდობიანი მოქალაქე დაიღუპა. უკრაინის შეიარაღებულ ძალებში აცხადებენ, რომ ოკუპანტები ამჟამად კონცენტრირებულები არიან პოზიციების გადაჯგუფებაზე და გაძლიერებაზე. უკრაინის გენერალური შტაბის ინფორმაციით, რუსეთის არმიამ თითქმის სრულად დაკარგა 331-ე გვარდიის საჰაერო-სადესანტო პოლკის რაზმი, რომელიც კიევის მიმართულებით საომარ მოქმედებებში მონაწილეობდა. უკრაინული მხარის ცნობით, ომის დაწყებიდან, უკრაინელმა ჯარისკაცებმა 10-ზე მეტი რუსი სამხედრო მეთაურის ლიკვიდაცია მოახდინეს, მათ შორის არის ექვსი გენერალი. ამ დროის მონაცემებით, მოსახლეობის ევაკუაციისთვის გახსნილია 7 ჰუმანიტარული დერეფანი. ეწვიეთ ჩვენს საიტს - https://1tv.ge/ მოიწონეთ ჩვენი გვერდი -   / 1stchannel.1tv.ge   გამოიწერეთ ჩვენი არხი -    / georgianpb   ვიდეო წარმოადგენს საზოგადოებრივი მაუწყებლის საკუთრებას. მისი გავრცელება შეგიძლიათ მხოლოდ ბმულის გაზიარებით. დაუშვებელია მასალის ჩამოტვირთვა და სხვაგან ატვირთვა, ამ შემთხვევაში მაუწყებელი უფლებას იტოვებს მიმართოს შესაბამის ზომებს.