ექსპერტები: პირდაპირი დიალოგი დეოკუპაციისთვის - შესაძლებლობა და სივრცე

"სტრატეგიული კვლევების კავკასიური ცენტრის" ხელმძღვანელს, მამუკა არეშიძეს ერთობლივი დიალოგის წარმოება "ცოტა ილუზორულად" ეჩვენება, მაგრამ დიალოგისთვის მომზადება შესაძლებელად მიაჩნია. "შანსიც არსებობს," - აცხადებს მამუკა არეშიძე და დასძენს, რომ "პოლიტიკური თემის აქტივაციის შემთხვევაში რუსეთი იმდენად აქტიურად ჩაერევა, რომ ყველაფერს გააფუჭებს. გარდა ამისა, პოლიტიკურ თემებზე ლაპარაკი მხოლოდ დეფაქტო ხელისუფლების წამროამდგენლებთან შეიძლება, ქვედა რგოლებთან საუბარს აზრი არ აქვს. ამიტომ, სჯობს, ისეთი თემებით დავიწყოთ, რომელში მონაწილეობას ქვედა რგოლებიც მიიღებენ და როცა ნდობა გაჩნდება, მერე ნელ-ნელა დავიწყოთ სხვა თემებზე საუბარი." "ტერორიზმის და პოლიტიკური ძალადობის ცენტრის" ხელმძღვანელის, ბადრი ნაჭყებიას აზრით, მხოლოდ სოხუმთან და ცხინვალთან პირდაპირი დიალოგი კონტრპროდუქტიული იქნება, თუ ამ დიალოგში მონაწილეობას არ მიიღებს რუსეთი, რომელიც ამ რეგიონებს მართავს. ამ ეტაპზე მხოლოდ ჰუმანიტარულ საკითხებზე შეიძლება საუბარი. "სამხრეთ კავკასიის რეგიონული უსაფრთხოების ინსტიტუტის" დირექტორი ალექსანდრე რუსეცკი აცხადებს, რომ მოსკოვთან დიალოგი აუცილებელია და ეს არის სახელმწიფოთაშორისი ფორმატი. რაც შეეხება სოხუმს და ცხინვალს, "სოხუმს უნდა ელაპარაკონ სოხუმელები და ცხინვალს უნდა ელაპარაკონ ცხინვალელები. ურთიერთობის პირველი დონე უნდა იყოს მათ შორის კომუნიკაცია. ამ რეგიონების სეპარატისტულ რეგიონებად გამოცხადება ანტისახელმწიფოებრივი და ანტიჰუმანურია," - ამბობს ალექსანდრე რუსეცკი. ამ თემაზე ვრცელი მასალა იხილეთ ბლოგზე: https://bondomdzinarashvili.blogspot....