პოლიტოლოგები: პირდაპირი დიალოგი დეოკუპაციისთვის - შესაძლებლობა და სივრცე

პოლიტოლოგ, პროფესორ თამარ კიკნაძის აზრით, რაც უფრო მეტი დრო გადის, მით უფრო რთულდება რუსეთთან დიალოგის წარმოება. \"ჩვენ არ ვართ ჩვენს მოქმედებებში თავისუფლები და იძულებული ვართ, მივიღოთ ისეთი გადაწყვეტილებები, რომლებსაც ეთანხმება დასავლური თანამეგობრობა. გარკვეული დიასპორები, სპეცსამსახურები ძალიან ცუდად მუშაობენ იმისთვის, რომ რუსეთ-საქართველოს შორის არ გაიმართოს დიალოგი. ქართულმა მხარემ ეს უნდა გაითვალისწინოს. ამასთან, საქართველოს დანაწევრების ბევრი გეგმა არსებობს. დავსვათ კითხვა - ვის უფორ მეტად სჭირდება ეს დიალოგი? ალბათ, საქართველოს, - აცხადებს თამარ კიკნაძე.

პოლიტოლოგი ვახტანგ ძაბირაძე ფიქრობს, რომ \"საზოგადოებრივ სივრცეში დიალოგი რაც უფრო ინტენსიური იქნება, ეს, უპირველესად, ხელს შეუშლის იმ პროცესს, რასაც მავთულხლართებით ცდილობენ. გაუცხოების პროცესი მაინც შეწყდება. პოლიტიკურ მხარეებს შორის დიალოგს გარკვეული დრო სჭირდება.უპირველესად საჭიროა დიალოგი მოსკოვთან, მაგრამ მოსკოვი დღეს არაფრისთვის არ არის მზად და მზად არ ვართ ჩვენც!\" \"ვინ უნდა აწარმოოს დიალოგი?!\" - კითხულობს ვახტანგ ძაბირაძე და იქვე პასუხობს: \"სანამ რუსეთს აქვს ოკუპირებლი ჩვენი ტერიტორიები, სანამ ჩვენ არ გვაქვს დიპლომატიური ურთიერთობა, მანამ რუსეთის ხელისუფლებასთან დიალოგის პრეროგატივა აქვს მხოლოდ საქართველოს ხელისუფლებას.\"

პოლიტოლოგს და სამხედრო ექსპერტს, პროფესორ ვახტანგ მაისაიას მიაჩნია, რომ ამ ეტაპზე პირდაპირი დიალოგი მოსკოვთან, - თუნდაც სახალხო დიპლომატიით ან არაფორმალური პოლიტიკური ურთიერთობის დონეზე, - ერთ-ერთი მნიშვნელოვანი ფაქტორია, რომ მშვიდობიანი გზებით დავიბრუნოთ ჩვენი ტერიტორიები. \"აფხაზეთისა და ცხინვალის რეგიონისთვის ყველაზე მიმზიდველი იქნება ევროკავშირთან ურთიერთობების განვითარება, რადგან ეკონომიკური კეთილდღეობის მიღწევის და სოციალური გაძლიერების შესაძლებლობა ევროკავშირის სივრცეში არსებობს. შესაბამისად, ალბათ ეს მომენტი იქნება ყველაზე მნიშვნელოვანი საქართველოს ტერიტორიული მთლიანობის აღსადგენად,\" - გამოსავალსაც გვთავაზობს ვახტანგ მაისაია.

ამ თემაზე ვრცელი მასალა იხილეთ ბლოგზე:
https://bondomdzinarashvili.blogspot....