არასრულწლოვანთა უსაფრთხოების დაცვა - სარეკომენდაციო დოკუმენტი

24 ნოემბერს, საქართველოს კულტურისა და ძეგლთა დაცვის სამინისტროში გაიმართა შეხვედრა, არასრულწლოვანთა უსაფრთხოების დაცვის მიზნით დოკუმენტის შემუშავების საკითხთან დაკავშირებით. შეხვედრაზე განიხილეს სარეკომენდაციო დოკუმენტის სამუშაო ვერსია, რომელიც არასრულწლოვანთა 24 საათზე მეტი დროით, მესამე პირების მიერ სხვადასხვა ღონისძიებაზე გაყვანისათვის უსაფრთხოების სტანდარტის შემუშავებას გულისხმობს. დოკუმენტი უწყებათაშორისმა კომისიამ შეიმუშავა. შეხვედრას დაესწრნენ საქართველოს კულტურისა და ძეგლთა დაცვის მინისტრი მიხეილ გიორგაძე, შრომის, ჯანმრთელობისა და სოციალური დაცვის, განათლებისა და მეცნიერიების, სპორტისა და ახალგაზრდობის საქმეთა და საქართველოს შინაგან საქმეთა სამინისტროების ხელმძღვანელი პირები, ასევე არასამთავრობო და სხვა დაინტერესებული ორგანიზაციების წარმომადგენლები. არსებული დოკუმენტი, დამატებითი რეკომენდაციებისა და რჩევების მიღების მიზნით, გადაგზავნილია ყველა დაინტერესებულ ფოკუს ჯგუფთან, ბავშვთა უფლებების დაცვის სფეროში მომუშავე ორგანიზაციებთან, ასევე საგანმანათლებლო, სახელოვნებო და სპორტულ ასოციაციებსა და კავშირებთან. დღეს შეხვედრის მონაწილეებმა იმსჯელეს სარეკომენდაციო დოკუმენტის სამუშაო ვერსიაზე, რომელიც ეხება როგორც ტრანსპორტის, კვების, დაბინავების, ბავშვზე ზრუნვის სტანდარტის, ასევე უსაფრთხოების (მათ შორის სახანძრო და სანიტარული) საკითხებს. არასრულწლოვანთა გაყვანისათვის სპეციალური რეგულაციების შემუშავების ინიციატივა საქართველოს კულტურისა და ძეგლთა დაცვის მინისტრს მიხეილ გიორგაძეს ეკუთვნის. http://www.culture.gov.ge/ http://www.facebook.com/culturegovge http://twitter.com/#!/CULTUREgovge    / culturegovge   http://www.flickr.com/photos/cultureg... http://www.myvideo.ge/?user_id=855045