სოფელ ზედა ეწერის გამგებელს 11 წლამდე პატიმრობა ემუქრება

ზუგდიდის მუნიციპალიტეტის სოფელ ზედა ეწერის გამგებელმა სევერიანე ბერულავამ ამავე სოფელში მდებარე ყოფილი ამბულატორიის შენობის აუქციონზე გატანისა და გამარჯვებაში დახმარების სანაცვლოდ, მოქალაქისგან ქრთამის სახით 15 000 ლარი მოითხოვა. ამის შესახებ ინფორმაციას სუს-ის ოფიციალური ვებ გვერდი ავრცელებს, რომელსაც რადიო "ათინათი" უცვლელად გთავაზობთ: "სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა ჩატარებული ოპერატიულ-სამძებრო და საგამოძიებო მოქმედებების შედეგად, დიდი ოდენობით ქრთამის აღების და ქრთამის აღებაში დახმარების ფაქტზე ზუგდიდის მუნიციპალიტეტის გამგეობის წარმომადგენელი სოფელ ზედა ეწერში სევერიანე ბერულავა და მოქალაქე ბადრი შ. დააკავეს. გამოძიებამ დაადგინა, რომ სევერიანე ბერულავამ ზუგდიდის მუნიციპალიტეტის სოფელ ზედა ეწერში მდებარე ყოფილი ამბულატორიის შენობის აუქციონზე გატანაში და გამარჯვებაში დახმარების სანაცვლოდ, ბადრი შ-ს შუამავლობით, მოქალაქეს ქრთამის სახით მოსთხოვა 15 000 ლარი. მოთხოვნილი თანხის ნაწილი - 5000 ლარი მათ მოქალაქეს წინასწარ გამოართვეს, რა დროსაც ისინი ანტიკორუფციული სააგენტოს თანამშრომლებმა ბრალდებულის სახით დააკავეს. გადაცემული თანხა 5000 ლარი ამოღებულია ნივთმტკიცებად. გამოძიება ქრთამის აღების და ქრთამის აღებაში დახმარების ფაქტზე მიმდინარეობს, რაც სასჯელის სახით ითვალისწინებს თავისუფლების აღკვეთას ვადით 7-დან 11 წლამდე. თბილისის საქალაქო სასამართლოს გადაწყვეტილებით საქმეზე დაკავებულ პირებს აღკვეთის ღონისძიების სახით შეეფარდათ პატიმრობა" , - ნათქვამია განცხადებაში. ცნობისთვის, ზედა ეწერის გამგებელი სევერიანე ბერულავა და მოქალაქე ბადრი შ. 30 მარტს დააკავეს. რადიო "ათინათი" Website: http://radioatinati.ge/ Facebook:   / rado.atinati.  . Google+: https://plus.google.com/u/0/116211701... Twitter: https://twitter.com/