შოთა რუსთაველი 850 - საზეიმო ღონისძიებები იერუსალიმის თეატრში

საქართველოს კულტურისა და ძეგლთა დაცვის სამინისტროს მხარდაჭერით, ისრაელში შოთა რუსთაველის 850 წლის იუბილე, სხვადასხვა ღონისძიებით, აღინიშნება. 10 დეკემბერს, კულტურის სამინისტროს დელეგაციის ორგანიზებითა და ისრაელში საქართველოს საელჩოს მხარდაჭერით, იერუსალიმის თეატრში საზეიმო ღონისძიებები ჩატარდა; თეატრის ფოიეში მხატვარ ქეთევან მატაბელის გამოფენა მოეწყო. გამოფენაზე წარმოდგენილი იყო მხატვრის მიერ, ვეფხისტყაოსნის თემაზე შესრულებული ნამუშევრები. ოდნავ მოგვიანებით კი თბილისის სიმფონიურმა ორკესტრმა და საქართველოს სახელმწიფო კაპელამ, პოეტის საიუბილეო თარიღისადმი მიძღვნილი კონცერტი გამართეს. კონცერტს ისრაელელი მაესტრო ამოს ტალმონი დირიჟორობდა; შესრულდა მოცარტის რექვიემი. ქართული დელეგაცია სამუშაო ვიზიტით ისრაელში, კულტურის მინისტრის მოადგილე მანანა ბერიკაშვილის ხელმძღვანელობით იმყოფება. ვიზიტის ფარგლებში, შოთა რუსთაველის 850 წლის იუბილესთან დაკავშირებით, ქვეყნის მასშტაბით, სხვადასხვა ქალაქში, არაერთი ღონისძიება ჩატარდა. http://culture.gov.ge/