21 ივნისის ღამეს დაშავებულების ჯანმრთელობის მდგომარეობა

21 ივნისის ღამეს, რუსთაველის გამზირზე დაშავებული მოქალაქეებიდან,  სხვადასხვა კლინიკაში მკურნალობას 52 პაციენტი განაგრძობს. თითქმის ყველა მათგანის ჯანმრთელობის მდგომარეობა სტაბილურია და მათი ნაწილი სამედიცინო დაწესებულებებს დღეს დატოვებს. ყველაზე მძიმე ოთხი პაციენტი, ამ დროისთვის მკურნალობას რეგიონულ ჰოსპიტალში აგრძელებს, მათი მდგომარეობა სტაბილურად მძიმეა. ნაწილს ნეიროქირურგიული ოპერაცია ჩაუტარდა, ნაწილს კი ქირურგიული ჩარევა თვალზე დასჭირდა. რაც შეეხება სხვა დაშავებულებს, ალადაშვილის კლინიკიდან დღეს 7, ღუდუშაურის საავადმყოფოდან კი 4 პაციენტი გაეწერება. ინგოროყვას კლინიკაში ამ დროისთვის 9 პაციენტი რჩება, ისინი მკურნალობას ქირურგიულ განყოფილებაში განაგრძობენ. მედიკოსების განმარტებით, პაციენტები სამედიცინო დაწესებულებას, სავარაუდოდ, ორშაბათს დატოვებენ. დაშავებულთაგან 11  რჩება „ნიუ ჰოსპიტალში“. არც ერთ მათგანს სიცოცხლისთვის საშიში დაზიანებები არ აღენიშნებათ. 21 ივნისის ღამეს, რუსთაველის გამზირზე ჩვენი კოლეგებიც დაშავდნენ, მათ შორის საქართველოს პირველი არხის თანამშრომლები. ჟურნალისტი ლიკა ალელიშვილი, რომელსაც ტყვია ფეხიდან ამოუღეს, ამ დროისთვის თავს კარგად გრძნობს და ღუდუშაურის კლინიკაში რჩება. ეწვიეთ ჩვენს საიტს - https://1tv.ge/ მოიწონეთ ჩვენი გვერდი - https://www.facebook.com/pg/1stchannel/ გამოიწერეთ ჩვენი არხი -    / georgianpb   ვიდეო წარმოადგენს საზოგადოებრივი მაუწყებლის საკუთრებას. მისი გავრცელება შეგიძლიათ მხოლოდ ბმულის გაზიარებით. დაუშვებელია მასალის ჩამოტვირთვა და სხვაგან ატვირთვა, ამ შემთხვევაში მაუწყებელი უფლებას იტოვებს მიმართოს შესაბამის ზომებს.