პრემიერ-მინისტრმა საკოორდინაციო ჯგუფის წევრებთან საგანგებო შეხვედრა გამართა

საქართველოს მთავარ სამთოსათხილამურო კურორტებზე წყალმომარაგების შეფერხებასთან დაკავშირებით, პრემიერ-მინისტრმა საკოორდინაციო ჯგუფის წევრებთან საგანგებო შეხვედრა გამართა. შეხვედრაზე განიხილეს წყალმომარაგების კუთხით შექმნილი პრობლემის გამომწვევი მიზეზები და ის ნაბიჯები, რომელსაც შესაბამისი უწყებების წარმომადგენლები პრობლემის დაფიქსირების შემდეგ დგამენ. შესაბამისი უწყებების წარმომადგენელთა განმარტებით, პრობლემა გამოიწვია უმეტესად მშრალმა, უნალექო კლიმატმა, რის შედეგად, წყლის რესურსი მკვეთრად შემცირდა. ასევე, სწორედ წყლის არასაკმარისი რესურსის გამო, ვერ მოხერხდა ხელოვნური გათოვლიანების სისტემის ამუშავებაც. საკოორდინაციო ჯგუფის ინფორმაციით, ზამთრის კურორტებზე, პრემიერ-მინისტრის დავალებით შექმნილი სამოქმედო გეგმის  განხორციელების შედეგად, მნიშვნელოვნად გაუმჯობესებულია საცობების პრობლემა, ასევე საგზაო ინფრასტრუქტურა - დასრულებულია შემოვლითი გზის მშენებლობა, წრიული გზის რეაბილიტაცია და შექმნილია დამატებითი საპარკინგე სივრცეები. შეხვედრის დასრულებისთანავე შესაბამისი უწყებების წარმომადგენლები კვლავ ადგილზე, ბაკურიანსა და გუდაურში გაემგზავრნენ, სადაც კოორდინირებულ რეჟიმში მუშაობას განაგრძობენ, რათა შესაძლო ხარვეზები მინიმუმამდე იყოს დაყვანილი. ეს ინფორმაცია პრემიერ-მინისტრის პრესსამსახურმა გაავრცელა. ეწვიეთ ჩვენს საიტს - https://1tv.ge/ მოიწონეთ ჩვენი გვერდი - https://bit.ly/2WZv1qY გამოიწერეთ ჩვენი არხი -    / georgianpb   ვიდეო წარმოადგენს საზოგადოებრივი მაუწყებლის საკუთრებას. მისი გავრცელება შეგიძლიათ მხოლოდ ბმულის გაზიარებით. დაუშვებელია მასალის ჩამოტვირთვა და სხვაგან ატვირთვა, ამ შემთხვევაში მაუწყებელი უფლებას იტოვებს მიმართოს შესაბამის ზომებს.