აკაკი ხორავას დაბადებიდან 120 წლისთავისადმი მიძღვნილი საიუბილეო საღამო

2015/06/06 აკაკი ხორავას სახელობის სენაკის სახელმწიფო დრამატულ თეატრში გაიმართა ქართული კინოსა და თეატრის ლეგენდის, აკაკი ხორავას დაბადებიდან 120 წლისთავისადმი მიძღვნილი საიუბილეო საღამო. დიდი ქართველი მსახიობის იუბილეზე სენაკს ესტუმრნენ საქვეყნოდ ცნობილი მსახიობები, რეჟისორები, ხელოვნებათმცოდნეები. მარჯანიშვილის, რუსთავის, გორის, ზუგდიდის, ოზურგეთის, თელავის, ცხინვალის თეატრალური დასების წარმომადგენლები. საღამო მიჰყავდა მსახიობ გოგი ქავთარაძეს. ღონისძიება აკაკი ხორავას ცხოვრებისადმი მიძღვნილი ლიტერატურული კომპოზიციით გაიხსნა ადგილობრივი დასის მსახიობების შესრულებით. საზოგადოებას მიესალმა სენაკის მუნიციპალიტეტის გამგებელი გოჩა დგებუაძე. გიორგი სააკაძისა და არსენას, ოიდიპოსისა და ოტელოს როლების უბადლო შემსრულებელი გაიხსენეს თეატრმცოდნეებმა: გოგი დოლიძემ და გუბაზ მეგრელიძემ, რეჟისორებმა: სანდრო მრევლიშვილმა, გიზო ჟორდანიამ და ბოლოს, ჩვენი ქალაქის მკვიდრებმა: მსახიობმა დიმიტრი ჯაიანმა და მწერალმა გურამ ბათიაშვილმა. მაყურებელს საშუალება ჰქონდა ენახა უნიკალური კადრები აკაკი ხორავას შემოქმედებიდან. აღსანიშნავია, რომ საქართველოს თეატრალური საზოგადოების პრეზიდიუმის გადაწყვეტილებით, დაარსდა აკაკი ხორავას სახელობის პრემია, რომელიც ქართული თეატრის განვითარებაში შეტანილი წვლილისთვის სენაკის დრამატული თეატრის სცენაზე გადაეცა ქართული საზოგადოებისათვის გამორჩეულად სათაყვანებელ მსახიობ თენგიზ არჩვაძეს.    / senakisgamgeoba   https://plus.google.com/u/0/110380087... https://www.facebook.com/senakis.gamg... http://www.senaki.ge/