ბოლნისში 2600 ჰექტარ სავარგულზე წყალუზრუნველყოფა გაუმჯობესდება.

27 ნოემბერს, ქვემო ქართლში სახელმწიფო რწმუნებულმა-გუბერნატორმა, შოთა რეხვიაშვილმა, საქართველოს გარემოს დაცვისა და სოფლის მეურნეობის სამინისტროს შპს „საქართველოს მელიორაციის“ გენერალურმა დირექტორმა, ოთარ შამუგიამ და ბოლნისის მუნიციპალიტეტის მერმა, დავით შერაზადიშვილმა იმირასანის სარწყავი სისტემის სათავე ნაგებობისა და მაგისტრალური არხის რეაბილიტაციის პროცესი დაათვალიერეს. აღდგენილი საირიგაციო სისტემით ბოლნისის მუნიციპალიტეტის სოფელ ჭაპალასა და სავანეთის 2600 ჰექტარ სავარგულზე გაუმჯობესდება წყალუზრუნველყოფა. პროექტის ღირებულება 1 895 000 ლარს შეადგენს. სამუშაოების ფარგლებში, მდინარე მაშავერაზე განთავსებულ სათავე ნაგებობაზე შეიცვლება გამრეცხი გალერეის ფარები თავისივე ამწე მექანიზმებით, დამონტაჟდება ლითონის გისოსები, რეაბილიტირდება იმირასანის მაგისტრალური არხის 5,5 კილომეტრიანი მონაკვეთი, არსებული გრუნტის არხი მოპირკეთდება ბეტონით, მოეწყობა წყალაღების კვანძი, შემტბორავი, გამანაწილებელი ჭა, საავტომობილო და საფეხმავლო ხიდები. მიმდინარე სარეაბილიტაციო სამუშაოებზე, ამ ეტაპზე, 30 ადგილობრივია დასაქმებული. კომპანიას სარწყავი სისტემის მოწესრიგების მიმართულებით მასშტაბური პროექტები აქვს დაგეგმილი მარნეულის მუნიციპალიტეტშიც, სადაც ხრამისა და ბარათაანთ არხის სისტემების რეაბილიტაცია განხორციელდება. #ქვემოქართლი2018 #ბოლნისი2018 #მელიორაცია2018 #გუბერნატორი2018 #შოთარეხვიაშვილი2018