CIU მულტიმედია ცენტრის ახალი პროექტი საზოგადოებრივი მაუწყებლის აჭარის ტელევიზიის ეთერში

სექტემბრიდან საზოგადოებრივი მაუწყებლის აჭარის ტელევიზიის ეთერში კავკასიის საერთაშორისო უნივერსიტეტის მულტიმედია ცენტრის პროექტი - „115 წამი - დღემდე მოტანილი ისტორია“ გავა. ოცდახუთი შემეცნებითი ვიდეორგოლი მაყურებელს მნიშვნელოვან ისტორიულ მოვლენებზე, ფაქტებსა და ღვაწლმოსილ ადამიანებზე უამბობს. თანამშრომლობის ახალი ეტაპის შესახებ ხელშეკრულებას ხელი აჭარის ტელევიზიისა და რადიოს დირექტორმა ვლადიმერ ტატიშვილმა და კავკასიის საერთაშორისო უნივერსიტეტის კანცლერმა ვახტანგ წივწივაძემ მოაწერეს. შეხვედრისას მხარეები პროგრამათაშორისი კონტენტის მომზადების, ეთერში განთავსების, თანამშრომლობის პროცესში ვალდებულებებისა და პასუხისმგებლობების შესახებ შეთანხმდნენ. აჭარის ტელევიზიასთან თანამშრომლობის მნიშვნელობაზე, ახალი პროექტის მიზნებსა და ამოცანებზე მულტიმედია ცენტრის ხელმძღვანელმა და კანცლერის მრჩეველმა ნინო ჭალაგანიძემ ისაუბრა. ვიდეორგოლების შინაარსობრივი და აუდიოვიზუალური მახასიათებლები, მასალის ფორმა, ფორმატი და მიწოდების გრაფიკი მულტიმედია ცენტრის ხელმძღვანელის მოადგილემ სულხან მელაძემ წარადგინა. მულტიმედია ცენტრისა და საზოგადოებრივი მაუწყებლის აჭარის ტელევიზიის ერთობლივი მედიაპროექტის მიზანი კონკრეტული მოვლენის შესახებ მინიმალურ დროში, მაქსიმალურად ამომწურავი ინფორმაციის გავრცელება და მაყურებლის ცნობიერების ამაღლებაა. #CIU_მულტიმედია_ცენტრი #ფოკუსი_შენზე #115_წამი #დღემდე_მოტანილი_ისტორია