„სპარის“ მენეჯერი ზეწოლაზე საუბრობს და სასამართლოში ჩივილს აპირებს

ზუგდიდში სუპერმარკეტი „სპარი“ გარემოსდაცვითი ზედამხედველობის სამსახურმა 1000 ლარით დააჯარიმა. სუპერმარკეტის ადგილობრივი ფილიალების ხელმძღვანელის გიორგი ნარმანიას ინფორმაციით, უწყების თანამშრომლებმა ფულადი ჯარიმა ყოველგვარი გაფრთხილების გარეშე გამოწერეს. მისივე თქმით, ეს წინასწარ იყო განსაზღვრული. გიორგი ნარმანია ამბობს, რომ მუყაოს ყუთები, რომელსაც სუპერმარკეტის ეზოს უკანა ნაწილშია, ყოველ საღამოს დასუფთავების მანქანას გააქვს. მისივე თქმით, ადგილზე მყოფ თანამშრომლებს ყურადღება არ მიუქცევიათ იმ სამშენებლო ნარჩენისა და ნაგვისთვის, რომელიც, წლების განმავლობაში, აქ ყრია. ნარმანია ჯარიმის დაკისრების ფაქტს „სპარის“ მეორე მაღაზიის გახსნასა და მიღწეულ წარმატებებს უკავშირებს. „ამ ფაქტს მე აღვიქვამ ბიზნესზე ზეწოლად. მე ვფიქრობ, რომ ვინაიდან „სპარი“ ასე დინამიურად და აქტიურად ვითარდება, რომელიღაც ბიზნეს-ჯგუფებს უშლის ხელს და ვიღაცები რომელიღაც თანამდებობზე ლობირებენ აღნიშნულ საკითხს და ხელოვნურად აჩერებენ ჩვენს შემდგომ განვითარებას“, - განაცხადა ჟურნალისტებთან ნარმანიამ. დაწესებულება ჯარიმის გადახდას არ აპირებს და ბრძოლას სამართლებრივი გზით გადაგრძობს. ის დარწმუნებულია, რომ შესაბამისი ვიდეო და სხვა მტკიცებულებების წარდგენის შემდეგ, სასამართლო გადაწყვეტილებას მათ სასარგებლოდ მიიღებს. „ვეცდებით, სამართლებრივად დავიცვათ თავი და დარწმუნებული ვარ, რომ სასამართლო ობიექტურ და კანონიერ გადაწყვეტილებაას მიიღებს“, - აღნიშნა ნარმანიამ. თავის მხრივ, გარემოსდაცვითი ზედამხედველობის სამეგრელო-ზემო სვანეთის სამმართველოს გარემოსდაცვითი ინსპექტირების განყოფილების თანამშრომლებმა კომენტარის გაკეთება არ ისურვეს. მოგვიანებით, უწყების ოფიციალურ ფეისბუქ გვერდზე გამოქვეყნდა ინფორმაცია, რომელშიც ნათქვამია, რომ მათ „მათ არ გააჩნიათ ვალდებულება, რომ წინასწარ გააფრთხილონ სამართალდამრღვევი“. „ქალაქ ზუგდიდში, გამსახურდიას გამზირზე მდებარე სუპერმარკეტების ქსელ "სპარის" მიმდებარე ტერიტორიაზე,სუპერმარკეტის თანამშრომლების მიერ, დაყრილი იყო დიდი რაოდენობით მუყაოს ყუთები. აღნიშნულთან დაკავშირებით, დეპარტამენტის თანამშრომლებმა შეადგინეს ადმინისტრაციული სამართალდარღვევის შესახებ ოქმი ნარჩენების მართვის კოდექსის 31 მუხლის მე-8 ნაწილით, რაც ითვალისწინებს საჯარიმო სანქციას 1000 ლარის ოდენობით”- აღნიშნულია განცხადებაში. უწყების ცნობით, „სპარის“ ადმინისტრაციამ მას შემდეგ გამოიძახა დასუფთავების სამსახური, რაც სამართალდარღვევის ოქმი შედგა. ამას კატეგორიულად უარჰყოფს ნარმანია და ამბობს, რომ ტერიტორია ნარჩენებისგან გარემოსდაცვითი ზედამხედველობის თანამშრომლების მოსვლიდან რამდენიმე წუთში გასუფთავდა, ოქმი კი რამდენიმე საათის შემდეგ შედგა. მისივე თქმით, ნარმანიას ამის დამადასტურებელი ვიდეომასალაც აქვს, რომელსაც სასამართლოში წარადგენს. რადიო "ათინათი" Website: http://radioatinati.ge/ Facebook: https://www.facebook.com/Rado.ATINATI... Google+: https://plus.google.com/u/0/116211701... Twitter: https://twitter.com/