დღეს 'იყიდე ქართულისა' და ფონდ 'იავნანას' ერთობლივი ინიციატივის პრეზენტაცია გაიმართება

დღეს "იყიდე ქართულისა" და ფონდ "იავნანას" ერთობლივი ინიციატივის პრეზენტაცია გაიმართება 26.02.2011 დღეს, 26 თებერვალს ქორთიარდ მარიოტში გაიმართება „იყიდე ქართული"-სა და საერთაშორისო საქველმოქმედო ფონდ "იავნანა"-ს ერთობლივი ინიციატივის პრეზენტაცია. ინიციატივა გულისხმობს ქართული პროდუქტების მწარმოებელი კომპანიების გაერთიანებას საერთო ეროვნული სავაჭრო ნიშნის ქვეშ, რაც მათ საშუალებას მისცემს ერთდროულად შეიძინონ ძლიერი მარკეტინგული ინსტრუმენტი და გააკეთონ კორპორატიული ქველმოქმედება „იავნანა"-ში. „იყიდე ქართული"-ს მოძრაობაში უკვე გაერთიანებულია 125 სპეციალური კრიტერიუმების მეშვეობით შერჩეული ქართული პროდუქტების მწარმოებელი კომპანია, რომელთა რიცხვი თანდათანობით სავარაუდოდ მკვეთრად გაიზრდება. ამ ეროვნული მოძრაობის მიზანია „იყიდე ქართული"-ს ლოგო გახდეს პროდუქტის „ქართულობის" საერთო და მთავარი მიმანიშნებელი სიმბოლო და იყოს ცნობადი ყველა საქართველოს მოქალაქისთვის. „იყიდე ქართული"-ს ინიციატივა გულისხმობს პროექტში მონაწილე ქართული პროდუქტების მწარმოებელი კომპანიებისაგან მოკრებილი თანხებით საერთო ეროვნული სავაჭრო ნიშნის პოპულარიზაციას, რომელიც იქნება ქართული პროდუქტების შეფუთვაზე და რომელიც გამოარჩევს ნამდვილად ქართულ პროდუქტებს უცხოურისაგან. გარკვეული პერიოდულობით მოკრებილი თანხების ნაწილი გადაერიცხება საერთაშორისო საქველმოქმედო ფონდ "იავნანა". http://kartuli.ge/