პრეზიდენტი და პირველი ლედი დღეს ორ საზოგადოებრივ ინიციატივაში ჩაერთნენ

გიორგი მარგველაშვილი - ერთმანეთის გაძლიერებით და გვერდში დგომით ჩვენ თვითონაც ვძლიერდებით #ვყიდულობთქართულს საქართველოს პრეზიდენტი და პირველი ლედი დღეს ორ საზოგადოებრივ ინიციატივაში ჩაერთნენ. გიორგი მარგველაშვილი და პირველი ლედი აქციას “იყიდე ქართული“ შეუერთდნენ. აქციის ფარგლებში, საახალწლოდ ოჯახისათვის ავლაბრის ბაზარში და სასურსათო მაღაზიაში ქართული წარმოების პროდუქტები და მაღაზია „იმერში“ ქუთაისის ფაბრიკაში შეკერილი სამოსი შეიძინეს. საქართველოს პრეზიდენტი და პირველი ლედი მოუწოდებენ საზოგადოებას შეუერთდნენ აქციას და შეიძინონ ქართული პროდუქცია. დღესვე საქართველოს პრეზიდენტი მეორე აქციასაც შეუერთდა. გიორგი მარგველაშვილი ქველმოქმედ აკა სინჯიკაშვილის აქციაშიც ჩაერთო, რომელიც სოციალურად დაუცველი ბავშვებისათვის საახალწლო საჩუქრების დარიგებას გულისხმობს. გიორგი მარგველაშვილმა საქართველოს პრეზიდენტის ადმინისტრაციის მხარდაჭერით, აკა სინჯიკაშვილს სოციალურად დაუცველი ბავშვებისათვის საჩუქრები - ჩურჩხელები და ჩიჩილაკები გადასცა. საქართველოს პრეზიდენტის ოფიციალური არხი Official Channel of The President of Georgia