112-ს თბილისის 130-ე საჯარო სკოლის მოსწავლეები ესტუმრნენ

შინაგან საქმეთა სამინისტროს 112-ის დეპარტამენტმა საინფორმაციო-საგანმანათლებლო პროექტის „მართლწესრიგის უზრუნველყოფისა და დანაშაულის პრევენციის პროგრამა საჯარო სკოლებისთვის“ ფარგლებში, თბილისის 130-ე საჯარო სკოლის უფროსკლასელებს უმასპინძლა. აღნიშნული პროექტი შინაგან საქმეთა სამინისტროს ინიციატივითა და ორგანიზებით, განათლებისა და მეცნიერების სამინისტროსთან თანამშრომლობით ხორციელდება. ვიზიტის ფარგლებში, მოზარდებმა 112-ის სამუშაო დარბაზი დაათვალიერეს და ოპერატორების მუშაობის სპეციფიკას ადგილზე გაეცნენ. მოსწავლეებმა ინფორმაცია მიიღეს გადაუდებელი დახმარების უნიკალური ნომრის - 112-ის შესახებ, რომლის დანიშნულებაა მთელი საქართველოს მასშტაბით, 24 საათის განმავლობაში, გადაუდებელი შემთხვევების დროს მოქალაქეთათვის დახმარების აღმოჩენა. გადაუდებელი დახმარების ოპერატიული მართვის ცენტრში მოზარდებს მიაწოდეს ინფორმაცია, როგორ და რა დროს უნდა დარეკონ 112-ზე. მოსწავლეებმა ასევე გაიგეს, რომელი გადაუდებელი სამსახურის ბრიგადის გამოძახებაა შესაძლებელი 112-ზე დარეკვით. მოზარდებმა დეტალური ინფორმაცია მიიღეს 112-ის ოპერატორთან თანამშრომლობის წესების შესახებ: თუ რა ინფორმაცია უნდა მიაწოდონ საგანგებო შემთხვევის დროს ოპერატორს და რა კითხვებზე უნდა ჰქონდეთ პასუხი. უფროსკლასელებს გადაუდებელი დახმარების ოპერატიული მართვის ცენტრის წარმომადგენლებმა განუმარტეს, რომ 112-ზე მხოლოდ გადაუდებელ შემთხვევებში უნდა დარეკონ. მოსწავლეებმა ასევე შეიტყვეს, რა ზიანის მომტანია ცრუ ზარის განხორციელება 112-ზე და რა სანქციებია გათვალისწინებული ნომრის არამიზნობრივად გამოყენების შემთხვევაში. სიახლის სრულად სანახავად გადადით შემდეგ ლინკზე: http://goo.gl/0VzoNf