ევროპის მაუწყებელთა კავშირის წარმომადგენლები პირველ არხზე

ევროპის მაუწყებელთა კავშირის დელეგაციის ვიზიტი საქართველოში გრძელდება. ციფრული ტრანსფორმაციის პროექტის ხელმძღვანელი, ცენტრალური და აღმოსავლეთ ევროპის წევრ ქვეყნებთან ურთიერთობის თავმჯდომარე, ციფრული ტრანსფორმაციის და პლატფორმების მიმართულების ხელმძღვანელი და საზოგადოებრივი მაუწყებლის გენერალური დირექტორი დღეს ევროკავშირის ელჩს, კარლ ჰარცელს სტუმრობდნენ. დახურულ შეხვედრაზე ისაუბრეს საზოგადოებრივი მაუწყებლის როლსა და ფუნქციაზე დემოკრატიულ სახელმწიფოში. ევროპის მაუწყებელთა კავშირის დელეგაციის წარმომადგენლებმა დღეს რამდენიმე სამუშაო შეხვედრა გამართეს, მათ შორის საქართველოს პირველი არხის ტექნიკურ დირექტორთან, პროექტ „მრავალფეროვანი საქართველოსა“ და არხის ვებ პლატფორმის ხელმძღვანელებთან. „იბიუს“ დელეგაციამ ასევე დაათვალიერა საქართველოს პირველი არხის რამდენიმე სტუდია და საეთერო. შეგახსენებთ, რომ ბოლო წლებში არხზე ძირეული ტექნიკური გადაიარაღება განხორციელდა, რომელიც რამდენიმე კვირაში ახალი საეთეროების, სამონტაჟოს, საარქივო პროგრამის გაშვებით დასრულდება. ორ კვირაში ახალი და მიმდინარე ამბების ბლოკის ყველა გადაცემის ავტომატიზაცია მოხდება, რაც მაღალი გარჩევადობის სატელევიზიო სტანდარტში ფუნქციონირებას უზრუნველყოფს. ეწვიეთ ჩვენს საიტს - https://1tv.ge/ მოიწონეთ ჩვენი გვერდი - https://bit.ly/2WZv1qY გამოიწერეთ ჩვენი არხი -    / georgianpb   ვიდეო წარმოადგენს საზოგადოებრივი მაუწყებლის საკუთრებას. მისი გავრცელება შეგიძლიათ მხოლოდ ბმულის გაზიარებით. დაუშვებელია მასალის ჩამოტვირთვა და სხვაგან ატვირთვა, ამ შემთხვევაში მაუწყებელი უფლებას იტოვებს მიმართოს შესაბამის ზომებს.