სამხედრო თემატიკის გამოფენა

საქართველოს პირველი დემოკრატიული რესპუბლიკის პერიოდის სამხედრო თემატიკის გამოფენა #საუკუნისამბავი #გვიამბეისტორია მოსწავლე-ახალგაზრდობის სასახლის სარკეებიან დარბაზში საქართველოს პირველი დემოკრატიული რესპუბლიკის პერიოდის სამხედრო თემატიკის გამოფენა გაიხსნა. ღონისძიება საქართველოს თავდაცვის სამინისტროს ეროვნულ არქივთან თანამშრომლობით, საქართველოს პირველი დემოკრატიული რესპუბლიკის 100 წლის საიუბილეო ღონისძიებების ფარგლებში გაიმართა. გამოფენა მოსწავლე-ახალგაზრდობის სასახლეში 7 მაისამდე გაგრძელდება გამოფენა დავით აღმაშენებლის სახელობის საქართველოს ეროვნული თავდაცვის აკადემიის რექტორმა, პოლკოვნიკმა ზაზა ჯაფარიძემ გახსნა. მისი განცხადებით, მნიშვნელოვანია, სამხედრო მოსამსახურეები საქართველოს სამხედრო ისტორიას იცნობდნენ და ეს ცოდნა საქართველოს თავდაცვისუნარიანობის გაძლიერებას, ასევე ქვეყნის განვითარებას მოახმარონ. ღონისძიების გახსას დავით აღმაშენებლის სახელობის საქართველოს ეროვნული თავდაცვის აკადემიის იუნკერები, გენერალ გიორგი კვინიტაძის სახელობის სამხედრო ლიცეუმის კადეტები და სამხედრო მოსამსახურეები დაესწრნენ. მათ ისტორიკოსმა დიმიტრი სილაქაძემ დემოკრატიული რესპუბლიკის პერიოდის შეიარაღებული ძალების შესახებ საჯარო ლექცია წაუკითხა. გამოფენაზე წარმოდგენილი იყო საქართველოს პირველი დემოკრატიული რესპუბლიკის პერიოდის სამხედრო თემატიკის ფოტო და დოკუმენტური საარქივო მასალების ასლები; მათ შორის, რუსეთ-საქართველოს 1921 წლის ომში მონაწილე უფროსი კურსის იუნკერთა სიის ნაწილი, 1918 წელს გადაღებული ფოტო - გენერალი გიორგი კვინიტაძე გერმანელ სამხედროებთან ერთად, სამხედრო სამინისტროს თანამშრომლები, ქართველი არტილერისტები და სახალხო გვარდიელები, 1919 წლის დოკუმენტი, თუ როგორი იყო შეიარაღებული ძალების სტრუქტურა, ან ოფიცერთა ატესტაციის პროექტი, ასევე, საქართველოს პარლამენტის ეროვნულ ბიბლიოთეკაში დაცული საარქივო ფოტოები.