ითხვისი ჩაქცევიდან 8 თვის შემდეგ

https://mtisambebi.ge/ - ჭიათურის სოფელ ითხვისში, მიწის ჩაქცევიდან, რამდენიმე სახლი რომ დამარხა და ათობით დაანგრია, 8 თვე გავიდა. ხელისუფლებამ უსახლკაროდ დარჩენილ ოჯახებს ბინები ჭიათურაში, ძირითადად, კორპუსებში უქირავა. 75 წლის ინვერი მახათაძის ორსართულიანი სახლი მთლიანად დანგრეულია. მეპატრონე მშობლიურ კარმიდამოს ვერ ელევა. სახელდახელოდ ფარდული ააწყო და თავს იქ აფარებს. დანაპრალებულ ეზოში ვაზს და ხეხილს მაინც უვლის. ჭიათურაში ძაღლიც არ გაჰყვა. მეუღლეც იქვე, გვერდით მდებარე სასაფლაოზე ჰყავს დაკრძალული. ინვერი ბაბუა ჭიათურიდან ითხვისში ყოველ დილით ადის და ნაქირავებ ბინაში, უკან, გვიან საღამოს ბრუნდება. სამთავრობო კომისიამ დასკვნაში დაწერა, რომ ითხვისის უბედურება „ჯორჯიან მანგანეზის“ მიერ მანგანუმის მოპოვებას არ უკავშირდება. ინვერი მახათაძეს მაღაროში მუშაობის 45 წლიანი გამოცდილება აქვს. ის და მისი თანასოფლელები, მაღაროში მუშაობის ამდენივე ან უფრო მეტი სტაჟით, დარწმუნებულები არიან, მიწა სწორედ იმის გამო ჩაიქცა, რომ კომპანიამ სოფლის ქვემოდან მანგანუმის ის ნაწილიც გაიტანა, რომელიც 80-იან წლებში სპეციალურად არ აითვისეს, რათა სოფელი სიცარიელეზე არ დარჩენილიყო და არ ჩანგრეულიყო. #მთისამბები