ნინო კასრაძის საუბრები ესმა ონიანზე ზუგდიდში

ზუგდიდის ცენტრალურ ბიბლიოთეკაში მსახიობმა ნინო კასრაძემ ქართველი მხატვრისა და პოეტის ესმა ონიანის წიგნი „ისევ მე ვარ?! ისევ მოვსულვარ!“ წარადგინა. მან ავტორზე ისაუბრა და მისი ლექსები წაიკითხა. კასრაძის თქმით, დღევანდელი საღამოს მიზანია, პასუხი გაეცეს კითხვას, თუ რატომ არ იცნობს საზოგადოება ისეთ დიდ მწერალს, როგორიც ონიანია. მისი აზრით პოეტის შემოქმედება არ არის მარტივი. საღამოზე მსახიობმა ესმა ონიანის, როგორც პოეტის, დაფასებაზე თავის დროზე რეზი თვარაძის სიტყვები წაიკითხა: “ეს იყო სიმძაფრე, რომელიც ძნელი გასაძლები იყო იმ დროისთვის. მაშინ ასე არავინ არ წერდა, გარდა ანა კალანდაძისა და ადრეული გალაკტიონისა. ეს დღემდეც ვერ აიტანა ქართულმა საზოგადოებამ. ამიტომ არის, რომ ესმა ონიანი, უბრწყინვალესი პოეტი, დღემდე დარჩენილია სალონებისა და ცალკეული ოჯახური წრეების კუთვნილებად. სხვათა შორის, ამაში არ ვხედავ არაფერს ცუდს. ესმა არ შეიძლება იყოს მასობრივი პოეტი, მასებში საკითხავი პოეტი, მრავალ ასეულათასიანი მკითხველის პოეტი”. როგორც ნინო კასრაძემ აღნიშნა ის ყველაფერში ეთანხმება თვარაძეს გარდა ერთისა, ესმა ონიანის ლექსები უნდა იყოს ფართო საზოგადოებისთვის და სწორედ მისი ლექსების პოპულარიზაციას ემსახურება დღევანდელი საღამო. მსგავსი შეხვედრები თავად კასრაძისა და გამომცემლობა „არტანუჯის“ რედაქტორის ზვიად კვარაცხელიას ინიციატივით საქართველოს მასშტაბით იმართება. გამომცემლობა „ინტექლექტმა“ და „არტანუჯმა“ ცოტა ხნის წინ გამოსცეს ესმა ონიანის „ასი ლექსი“. „არტანუჯმა“ კი პოეტის სრული შემოქმებითი მემკვიდრეობა - „ისევ მე ვარ, ისევ მოვსულვარ“. რადიო "ათინათი" Website: http://radioatinati.ge/ Facebook:   / rado.atinati.  . Google+: https://plus.google.com/u/0/116211701... Twitter: https://twitter.com/