https://mtisambebi.ge/ - მიშო დაუშვილი თბილისიდან რაჭაში, შქმერში საცხოვრებლად 4 წლის წინ დაბრუნდა. მაშინ საჩხერე-ონის ახალი გზა ჯერ კიდევ არ იყო. 25 წლის ბიჭმა, მიტოვებულ მამაპაპისეულ სახლში მეურნეობა 5 სული საქონლით დაიწყო, ბანკიდან სესხიც აიღო, „მთის ამბების“ მაყურებლებიც დაეხმარნენ და ახლა უკვე კაპიტალური ფერმა აქვს. ახალი გზის მშენებლობის შემდეგ, რის შედეგადაც შქმერი აღარც მკაცრ ზამთარში წყდება გარესამყაროს, მიშოს ტურიზმის განვითარებაც ჰქონდა გეგმაში, მაგრამ მას შემდეგ, რაც მთავრობამ შქმერში, ღია კარიერული წესით მანგანუმის მოპოვების ლიცენზიები გასცა და რაჭის 80-მდე სოფლის გარშემო 104 712 ჰექტარი ტყე პუტინის ხელისუფლებასთან დაკავშირებულ ბიზნესმენს გადასცა, მიშოს გეგმები თავდაყირა დადგა. არამხოლოდ მიშოს გეგმები! თან რაჭის ტყის ნახევარი საუკუნით გადაცემა იმ დროს მოხდა, როცა შქმერში მამაპაპისეული მიწების დაკანონებას ვერ ახერხებენ - „ატყუებენ ხალხს, რომ აი, სოფელში დაბრუნდით, მაგრამ ვინც აქ ბრუნდება, ორჯერ მეტი პრობლემა ხვდება“.
