შეხვედრა საპარლამენტო უმრავლესობასთან

ჩვენ ერთად გვაქვს აღებული პასუხისმგებლობა ქართველი ამომრჩევლის წინაშე და დაწყებული საქმე ერთად უნდა მივიყვანოთ ბოლომდე; ამიტომ, თქვენი ინიციატივები, თქვენი შენიშვნები უაღრესად მნიშვნელოვანია მთავრობისთვის, - ეს განცხადება საქართველოს პრემიერ-მინისტრმა ირაკლი ღარიბაშვილმა საპარლამენტო უმრავლესობასთან შეხვედრისას გააკეთა. მთავრობის მეთაური დარწმუნებულია, რომ სიახლეები, რომელთა განხორციელებას მთავრობა განახლებული გუნდით გეგმავს, მოქალაქეებისთვის სასიკეთო იქნება. პრემიერ-მინისტრის შეხვედრა საპარლამენტო უმრავლესობის დეპუტატებთან კითხვა-პასუხის რეჟიმში წარიმართა. ირაკლი ღარიბაშვილმა აღნიშნა, რომ წელს დაიწყება ხელნაწერთა ეროვნული ცენტრის ახალი შენობის მშენებლობა, რადგან ეროვნულ საგანძურს - ქართულ ხელნაწერებს, სათანადო ყურადღება სჭირდება. პრემიერის განმარტებით, პროცესი გამჭვირვალედ წარიმართება და საქართველოს ექნება ხელნაწერთა ეროვნული ცენტრის შესაფერისი შენობა. პრემიერმა ასევე მიმართა მთავრობის წევრებს, უახლოეს სხდომაზე წარადგინონ „მთის კანონის“ პროექტი, რათა მისი დამტკიცება საგაზაფხულო სესიის დასრულებამდე მოესწროს. პრემიერ-მინისტრმა ასევე ხაზი გაუსვა ვეტერანთა დამსახურებას და აღნიშნა, რომ მათ სახელმწიფოს მხრიდან სათანადო ყურადღება სჭირდებათ. ირაკლი ღარიბაშვილმა მთავრობის წევრებთან ერთად დეტალურად ისაუბრა იმ სიახლეებზე, რომლებსაც სამთავრობო პროგრამა მოიცავს და საპარლამენტო უმრავლესობის წევრებს მინისტრთა კაბინეტის განახლებული შემადგენლობის მხარდაჭერისკენ მოუწოდა. ვრცლად, მთავრობის მიერ პარლამენტში დასამტკიცებლად წარდგენილი პროგრამა იხილეთ: http://irakligaribashvili.ge/?p=5657