ევგენი მიქელაძის სახელობის სამუსიკო სასწავლებლის რემონტი დასრულდა

ევგენი მიქელაძის სახელობის ცენტრალური სამუსიკო სასწავლებელი 2016-2017 სასწავლო წელს განახლებული ინფრასტრუქტურით ხვდება. 16 სექტემბერს, საქართველოს კულტურისა და ძეგლთა დაცვის მინისტრი მიხეილ გიორგაძე, მინისტრის მოადგილე გიორგი ბაქრაძესთან ერთად, სასწავლებელს ეწვია და გარემონტებული შენობა დაათვალიერა. 2015 წელს, საქართველოს კულტურისა და ძეგლთა დაცვის სამინისტრომ სამუსიკო სასწავლებლის შენობის სარემონტო სამუშაოებისთვის 155 000 ლარი გამოყო; პროექტის ფარგლებში, გამოიცვალა შენობის სახურავი, სხვენში გაკეთდა ცხრა საკლასო ოთახი; დამონტაჟდა ცენტრალური გათბობა და გაკეთდა ვერანდები; შენობაში მთლიანად შეიცვალა ელექტროგაყვანილობის სისტემა; გარემონტდა საკონცერტო დარბაზი და სველი წერტილები; გამოიცვალა იატაკი; კულტურის სამინისტროს მხარდაჭერით გაუმჯობესდა ასევე ინფრასტრუქტურა შენობის მიმდებარე ტერიტორიაზე; კერძოდ, გაკეთდა საფეხმავლო ბილიკები, ეზოში დაიდგა ლამპიონები, სკამები, მოეწყო ფანჩატური, შეიცვალა შესასვლელი ჭიშკარი, შეილესა და შეიღება ღობეები, ზედ დამონტაჟდა მეტალო-კონსტრუქციის მოაჯირები. http://culture.gov.ge/