კალაუბნის რეაბილიტაცია

http://new.tbilisi.gov.ge/rehabilitation ქ. თბილისის მერია დედაქალაქის ერთ-ერთი ისტორიული ნაწილის კალაუბნის რეკონსტრუქცია-რეაბილიტაციის პროექტს იწყებს. თბილისის ამ უძველეს უბანში დღესაც შემორჩენილია შუა საუკუნეებში აშენებული ეკლესიები და XIX საუკუნის საცხოვრებელი სახლები. მათგან ბევრი ე.წ "თბილისური სახლის" საუკეთესო ნიმუშს წარმოადგენს. თბილისის მერია დედაქალაქის ძველი უბნების გადარჩენისთვის ზრუნვას აგრძელებს. სარესტავრაციო სამუშაოებს თბილისის მერია, ძველი თბილისის განვითარებისა და რეაბილიტაციის ფონდთან ერთად 2 თებერვალს დაიწყებს. პროექტის ფარგლებში, გამაგრებითი და სარეაბილიტაციო სამუშაოები ქვემო კალაუბანში არსებულ 30-მდე საცხოვრებელ სახლს ჩაუტარდება. უძველესი ნაგებობების სახურავები საუკეთესო ხარისხის თუნუქითა და კრამიტით გადაიხურება. ეზოები ძველი თბილისისთვის დამახასიათებელი აგურის ღობეებით შემოიფარგლება. გაკეთდება ღია, შემინული აივნები. კალაუბანში მთლიანად გამოიცვლება წყალსადენის და კანალიზაციის მილები, ასევე სანიაღვრე ქსელები. დამონტაჟდება ახალი გარე განათების ბოძები. რაც მთავარია, კალაუბანი ძველ იერსახეს შეინარჩუნებს. მოსახლეობას კი ცხოვრების უკეთესი პირობები შეექმნება. თითოეულ ეზოში მიწისქვეშა კომუნიკაციები გამოიცვლება. კალაუბნის რეკონსტრუქცია-რეაბილიტაციის პროექტის თანხებს დედაქალაქის მთავრობა დაფარავს. კალაუბანი თბილისის ამჟამინდელ ცენტრს ემიჯნება და ორი ნაწილისგან -- ზემო და ქვემო უბნებისგან შედგება.