ბავშვთა უფლებები

პროექტის"ერთად შევეგებოთ ევროპას" ფარგლებში გრძელდება ევროკავშირის კამპანია "2015 წელი ევროპული განვითარებისთვის" ‪#‎EYD‬. საჯარო ლექცია ივლისის თვის თემაზე - "ბავშვთა უფლებები“ ივანე ჯავახიშვილის სახელობის თბილისის სახელმწიფო უნივერსიტეტში გაიმართა. ლექცია წაიკითხეს გაეროს ბავშვთა ფონდის (UNICEF) კომუნიკაციების პროგრამის ხელმძღვანელმა მაია ქურციკიძემ და ევროკავშირის წარმომადგენლობა საქართველოს (EUD) წარმომადგენელმა ნიკა ყოჩიშვილმა. შეხვედრას ესწრებოდნენ მოსწავლეები და პედაგოგები ქვემო ქართლის რეგიონიდან და თბილისიდან, რომლებიც სამოქალაქო განათლების პედაგოგთა ფორუმის წევრები არიან. გაერთიანებული ერების ორგანიზაციამ ბავშვთა უფლებების კონვენცია 1989 წლის 20 ნოემბერს მიიღო. იგი ძალაში 1990 წლის 2 სექტემბრიდან შევიდა. კონვენცია შედგება 54 მუხლისაგან, რომელთაგან პირველი 42 მუხლი ბავშვის დაცვასთან დაკავშირებულ ძირითად პრინციპებს შეეხება - ბავშვის უფლებებს, სახელმწიფოს ვალდებულებებს და ბავშვის აღზრდასთან დაკავშირებული ადამიანების მოვალეობებს. 43-54 მუხლებში კი საუბარია იმაზე, თუ რა უნდა გააკეთონ სახელმწიფომ და ზრდასრულმა ადამიანებმა ერთად კონვენციით ნაკისრი ვალდებულებების შესასრულებლად. საქართველო აღნიშნულ კონვენციას 1994 წელს შეუერთდა, რაც ნიშნავს რომ ქვეყანამ აიღო კონვენციით ნაკისრი ვალდებულებების შესრულების სამართლებრივი პასუხისმგებლობა.