ბორჯომის ხეობაში რეკომენდაციები ნაწილობრივ მოიხსნა

ბორჯომის ხეობის მასშტაბით, შემცირებული დაკვამლიანობის გამო, არსებული რეკომენდაციები ნაწილობრივ მოხსნილია. ამის შესახებ შრომის, ჯანმრთელობისა და სოციალური დაცვის მინისტრმა, დავით სერგეენკომ განაცხადა. შეზღუდვები მხოლოდ იმ პუნქტებში რჩება, სადაც კვამლი შეინიშნება. „დღის განმავლობაში გარემოს დაცვის სამინისტრომ რამდენიმე დასახლებულ პუნქტში მყარი ნაწილაკების და შესაბამისი პარამეტრების სინჯი აიღო. საბედნიეროდ, ნორმის ფარგლებშია. რისკები მნიშვნელოვნადაა შემცირებული, თუმცა ერთეული კერები რჩება და ამიტომ გუშინდელი რეკომენდაციები - ბავშვებს და ქრონიკული დაავადებების მქონე მოზრდილებს მთელი ხეობის მასშტაბით თავი შეეკავებინათ, მოხსნილია. რჩება მხოლოდ იმ პუნქტებში, სადაც მოსახლეობა შენიშნავს, რომ კვამლი იგრძნობა.“- აღნიშნა დავით სერგეენკომ. სტიქიის ზონაში, ჯანდაცვის სამინისტროს საგანგებო სიტუაციების კოორდინაციისა და გადაუდებელი დახმარების ცენტრი მაშველებსა და მოსახლეობას რესპირატორებსა და პირბადეებს აწვდის. ადგილზე პირველადი სამედიცინო დახმარების გასაწევად მობილიზებულია სასწრაფო სამედიცინო დახმარებისა და რეანომობილის ეკიპაჟები. პროცესს პირადად კურირებს საგანგებო სიტუაციების კოორდინაციისა და გადაუდებელი დახმარების ცენტრის დირექტორი ავთანდილ თალაკვაძე. #ვითარებაბორჯომში