პარლამენტს გარეთ დარჩენილმა ზვიად ძიძიგურმა ბიძინა ივანიშვილი ამხილა

“ქართული ოცნებიდან” და საპარლამენტო უმრავლესობიდან განშორებისთანავე ზვიად ძიძიგური, ბიძინა ივანიშვილზე უკვე ღიად ალაპარაკდა, რასაც ხელისუფლებაში ყოფნის დროს ვერ ან არ ბედავდა. გია გაჩეჩილაძის გადაცემაში “უცნობის კიდობანი” მან თქვა, რომ ხელისუფლებას, რეალურად მართავს ბიძინა ივანიშვილი, რომლის წინაშეც ანგარიშვალდებული არიან როგორც მთავრობის, ასევე საკანონმდებლო და სასამართლო ხელისუფლების წარმომადგენლები. მისივე თქმით, ბიზნესის ცალკეული სეგმენტიც მის წინაშეა ანგარიშვალდებული. “როგორი ვითარება გვაქვს რეალურად: პარლამენტი და მისი ყველა წევრი (ვგულისხმობ საპარლამენტო უმრავლესობას) ანგარიშვალდებულია ბიძინა ივანიშვილთან, მთავრობა და მისი ყველა მინისტრი ანგარიშვალდებულია არა პრემიერ-მინისტრის, არამედ ბიძინა ივანიშვილის წინაშე, სასამართლო ბიძინა ივანიშვილის, ბიზნესი ბიძინა ივანიშვილის – რა გამოვიდა? აბა 30 წელი რაში გაატარა ამ ქვეყანამ? პარლამენტი ინსტიტუტს აღარ ჰგავს, მთავრობა აღმასრულებელი ორგანო აღარ არის, სასამართლო დაღუპულია. ეს ხდება მაშინ, როცა ყველა არჩევნებში იძახი, “მიშა მოდის, მიშა მოდის” იღებ ამხელა ძალაუფლებას და ხდება ასეთი მმართველობა, როგორიც არის დღეს, მე ასეთი მმართველობა არ მახსოვს. ბიძინა ივანიშვილის ტექსტებს და ნააზრევს გველაპარაკებიან სხვა პირები, დისტანციური მმართველობა მივიღეთ” – განაცხადა ზვიად ძიძიგურმა “უცნობი”- ს გადაცემაში “უცნობის კიდობანი. მოიწონეთ ჩვენი გვერდი ფეისბუქზე, მიჰყევით ამ ბმულს: https://bit.ly/2D9tHM9 MULTIMEDIA.GE - მულტიმედია