საყოველთაო ჯანდაცვის პროგრამის ახალი სერვის ცენტრი გაიხსნა

დღეს შრომის, ჯანმრთელობისა და სოციალური დაცვის მინისტრმა დავით სერგეენკომ საყოველთაო ჯანდაცვის პროგრამის მომსახურების ახალი ოფისი გახსნა. თბილისის მასშტაბით, რიგით მეოთხე სერვისცენტრი ი. ჯავახიშვილის #51-ში მდებარეობს, აქ მოქალაქეებს თანამედროვე სტანდარტების შესაბამის გარემოში მოემსახურებიან. სერვისცენტრს დღეში 500-მდე მიმართვის მიღება შეუძლია. მომსახურების ოფისი შაბათ-კვირის გარდა, ყოველდღე 09:30-დან 18:00 საათამდე იმუშავებს. "საყოველთაო ჯანდაცვის პროგრამის აღნიშნული ოფისი რიგით მეოთხეა. ეს არის გამტარიანობით ყველაზე დიდი ოფისი. ვფიქრობ, რომ ეს ბევრად მეტი კომფორტი იქნება თბილისის და ზოგადად საქართველოს მოსახლეობისთვის, რომ მათ დაუყოვნებლივ მიიღონ სამედიცინო სერვისები", - განაცხადა დავით სერგეენკომ. საყოველთაო ჯანდაცვის პროგრამის მომსახურების ოფისში თანამშრომლები მოსახლეობას დაწვრილებით ინფორმაციას მიაწვდიან პროექტით სარგებლობის შესახებ. აღსანიშნავია, რომ ბენეფიციარები პროგრამის ფარგლებში, კუთვნილი მომსახურების მისაღებად საჭირო დოკუმენტაციას (საგარანტიო წერილი)ახალ სერვის ცენტრში მიიღებენ. ამ დრომდე თბილისში 3 ოფისი ფუნქციონირებდა: 1. ბახტრიონის #11ბ 2. ბოჭორმის ქუჩა #8 3. ვაჟა-ფშაველას მე-4 კვარტლის 1 კორპუსი.