ოპოზიციური ტელევიზიების წარმომადგენელთა ერთობლივი განცხადება

ნიკა გვარამიას დაპატიმრებისა და მისთვის სასჯელის მისჯის შემდეგ, "მთავარი "არხი"-ს, ფორმულა"-ს ტვ "პირველი"-ს და "კავკასიის" წარმომადგენლები ერთობლივ განცხადება/მიმართვას ავრცელებენ დასავლელი პარტნიორებისადმი. „ჩვენ დამოუკიდებელი მედიის წარმომადგენლები მივმართავთ ჩვენს დასავლელ მეგობრებს, დამოუკიდებელი მედიის, „მთავარი არხის“ დამფუძნებლისა და დირექტორის ნიკა გვარამიას დაჭერასთან დაკავშირებით. ნიკა გვარამიას დაკავება არის პირდაპირი, დემონსტრაციული გზავნილი დასავლეთისთვის, რომ საქართველო არის რუსული, ოლიგარქიული, მიტაცებული ქვეყანა და ის იმართება პუტინის მეთოდებით. ნიკა გვარამიას დაჭერა ნიშნავს, რომ საქართველო უარს ამბობს ევროპასა და NATO-ზე. ეს განსაკუთრებით თვალსაჩინოა საქართველოს ევროკავშირში გაწევრიანების განაცხადის განხილვის ფონზე. ასევე, „ოცნების“ რეჟიმის პოზიცია უკრაინაში მიმდინარე ომთან დაკავშირებით ცხადყოფს, რომ ხელისუფლება გაემიჯნა ცივილიზებულ სამყაროს და ნიკა გვარამიას დაკავება ამის კიდევ ერთი დასტურია. ნიკა გვარამიას დაჭერა არ არის ერთი მედიის ან ერთი ადამიანის საკითხი, ეს არის მთლიანად ქართული მედიის და ჩვენი ქვეყნის დემოკრატიის გადარჩენის საქმე. ჩვენ ოპოზიციური მედია ჩვენი საქმიანობით ყოველთვის მხარს ვუჭერთ დასავლურ ფასეულობებს და ვდგავართ დემოკრატიის სადარაჯოზე“. - აღნიშნულია ერთობლივ განცხადებაში. ჩვენი ვებ გვერდი: https://multimedia.ge ჩვენი გვერდი ფეისბუქზე, მიჰყევით ამ ბმულს: https://bit.ly/2D9tHM9