დაიწყება თუ არა ომი უკრაინაში?!
რა შესაძლებლობები ეძლევა საქართველოს?!
აშშ-მ და NATO-მ რუსეთის ულტიმატუმს , რომ არ დაიშვას ნატო-ს აღმოსავლეთით გაფართოება , უკრაინის და საქართველოს ჩრდილოატლანტიკურ ალიანსში გაერთიანება , უარით უპასუხა! რუსეთმა საპასუხოდ უკრაინის საზღვართან სამხედრო შენაერთების რაოდენობა გაზარდა და დამატებითი კონტიგენტი შეიყვანა ბელორუსიაში. აშშ-მ დააანონსა, რომ რუსეთი თებერვლის მეორე ნახევარში უკრაინაში ფართომასშტაბიან სამხედრო ოპერაციას განახორციელებს და მკაცრი სანქციებით დაემუქრა. დასავლეთმა უკრაინის დახმარება გააქტიურა, ღებულობს სამხედრო ტექნიკას და დაფინანსებას, ყოველდღე კიევში ჩადიან დასავლეთის ქვეყნების ლიდერები, მაგრამ ესკალაციის გამო ისეთი პანიკა შეიქმნა , რომ უკრაინიდან ინვესტორები გარბიან, უკვე 17 მილიარდი დოლარი გაიტანეს. უკრაინის ეკონომიკას სერიოზული საფრთხე შეექმნა. პრეზიდენტ ზელენსკიმ მადლობა მოუხადა დასვლეთს მაგრამ ხაზი გაუსვა იმსა ,რომ ომის ესკალაციას პირი ქმნის, რუსეთთან მიმართებაში კი რაფერი შეცვლილა იმასთან შედარებით რაც ადრე იყო!
არსებული მონაცემებით რუსეთი უკრაინაში ომის დაწყებას არ აპირებს! დასავლეთის წაქეზებით, კიევმა თუ დაიწყო სამხედრო ოპერაცია დომბასის თვითგამოცხადებულ რესპუბლიკების წინააღმდეგ, რუსეთი მათ დე-იურე აღიარებს და სამხედრო შენაერთებს შეიყვანს, მსგავსად იმისა რაც საქართველოში გააკეთა! უკრაინის მიმართ დიდი გეოპოლიტიკური თამაში მიდის და არ არის გამორიცხული, რომ მისმა მეზობლებმა ხელსაყრელ მომენტში ,სტალინის მიერ წართმეული ტერიტორიები უკან დაბრუნება მოინდომონ.
მოსკოვი ეცდება ესკალაციის ცენტრები რუსეთიდან მოშორებით გააღვივოს. შესაძლებელია საომარი მოქმედებები განახლდეს :ერაყში, ლიბიაში, იემენსა და საუდებს შორის, ვენესუელასა და კოლუმბიაში, ამერიკის მიმართ დაძაბულობის შექმნაში შესაძლოა ჩართოს კუბა, ნიკარაგუა და სხვა.
დასავლეთის სანქციებით მუქარა რუსეთს არ აშინებს. სანქციების დაწესების წინააღმდეგია გერმანია, საფრანგეთი და ევროკავშირის სხვა ქვეყნები. მათ სულაც არ უნდათ საკუთარი ეკონომიკას მიადგეს ზარალი და ევროპაში აშშ-ს ჰეგემონია დაწესდეს. მასოფლიო საფინანსო საანგარიშსწორებო CWIFT-ის სისტემიდან რუსეთის გამორთვა მძიმე იქნება მოსკოვისთვის და მას აიძულებს ჩინეთზე დამოკიდებული გახდეს, რითაც ჩინეთი უფრო გაძლიერდება! რევოლუციურ სცენარებს რუსეთი არ დაუშვებს, ეს ბელორუსიისა და ყაზახეთის მაგალითზე ყველამ დავინახეთ. ასე რომ სანქციებით მუქარა, შესატყვის ცვლილებას არ შეიტანს არსებულ დაპირისპირებაში.
შექმნილი ვითარება ახალ შესაძლებლობებს აძლევს საქართველოს. საქართველომ მხოლოდ ეროვნული და სახელმწიფოებრივი ინტერესებით უნდა იხელმძღვანელოს. საჭიროა დავარწმუნოთ დასავლეთი, რომ უკრაინასა და მოლდოვასთან ერთად ნატოში ჯგუფურად გაწევრიანება უშედეგოა. უკრაინისგან განსხვავებით, NATO-ში საქართველოს გაწევრიანებით რუსეთს უსაფრთხოების გლობალური სისტემა არ ერღვევა. ჩვენზე ზეგავლენის მოხდენის ბერკეტებიც ნაკლებად შემორჩა რუსეთს. მან სააკაშვილის ხელშეწყობით დაგვსაჯა და ტერიტორიების ოკუპირება მოახდინა. კრემლი ენერგეტიკულ ბლოკადასაც ვერ გაგვიკეთებს , რადგან ენერგო რესურსების მომწოდებელი ჩვენთან აზერბაიჯანია. ეთნიკურ დაპირისპირებას ვერ შექმნის, რადგან ეს არც სომხეთს არ აწყობს და არც აზერბაიჯანს. საქართველოში საზოგადოებრივი დაპირისპირების და რევოლუციის პროექტიც ჩაეშალა რუსეთს, სააკაშვილი ციხეშია! რუსეთის გაძლიერების ფონზე, დასვლეთისთვის საქართველო ერთადერთი საყრდენი რჩება კავკასიის რეგიონში. სტრატეგიული ინტერესების გამო სქართველოს დაკარგვას დასავლეთი არ დაუშვებს. გარე ფაქტორთა დისბალანსის ვითარებაში საქართველოს გაბედული ნაბიჯების გადადგმის საშუალება ეძლევა. ჩვენმა ხელისუფლებამ დასავლეთს მიკაფიოთ უნდა დაუყენოს საკითხი, რომ ზუსტი ვადები დაგვიწესონ NATO-ში და ევროკავშირში გაწევრიანებასთან დაკავშირებით არ დავრჩეთ მუდმივი ასპირანტის მდგომარეობაში. საქართველომ მეტი თავისუფლება უნდა გამოავლინოს, მტერთანაც კი უნდა დავილაპარაკოთ ჩვენი პრობლემების დასარეგულირებლად. ამ მხრივ საინტერესო იქნება ექვსთა კავშირთან ( თურქეთი, რუსეთი, ირანი, აზერბაიჯანი ,სომხეთი) თანამშრომლობა, პირველ ეტაპზე დამკვირვებლის სტატუსით. ეს კარგი პლატფორმაა ჩვენს მეზობლებთან დიალოგისთვის, მათ შორის რუსეთთან ურთიერთობის გასარკვევად. დასვლეთი უნდა დავარწმუნოთ, რომ ამ ორგანიზაციაში ჩვენ, მათი ინტერესების გამტარებელი ვიქნებით. სქართველომ შექმნილი ვითარება ისე უნდა გამოიყენოს, რომ ჩვენი სუვერენიტეტის დაცვის, ტერიტორიული პრობლემების მოგვარების და უსაფრთხოების ახალი სტრატეგია შევიმუშაოთ. დასავლეთის და რუსეთის ინტერესთა დაბალანსების საფუძველზე , ურთიერთობის ახლი ფორმატი შევთავაზოთ და საქართველოს პოზიციების ყოველმხრივ გაძლიერებას მივაღწიოთ!
მთლიანობაში იმედი უნდა ვიქონიოთ , რომ დიპლომატიას ჯერ არ ამოუწურავს თავისი შესაძლებლობები და რუსეთ- დასავლეთის გლობალური დაპირისპირება არ გადაიზრდება საომარ მოქმედებებში .
ექვსი ათას წელზე მეტია კაცობრიობა ვითარდება, დაეუფლა ბირთვულ ენერგიას, შეუდგა კოსმოსის ათვისებას, მაგრამ იმპერიალისტური მოტივაციები, რესურსებისთვის და ტერიტორიებისთვის ბრძოლა, ფინანსებისა და ბაზრების კონტროლი, დაპყრობა და ომი ჩვენი ცივილიზაციის პარადიგმის უცვლელ საფუძვლად რჩება! დღევანდელი საერთაშორისო დაძაბულობა ამის კონკრეტული მაგალითია. დროა ყველას საზრუნავად ვაქციოთ თანამედროვე საზოგადოების არსებობის, თანაცხოვრების პრინციპების და ჩვენი ცივილიზაციის პარადიგმის შეცვლა!
ლევან მამალაძე
