ნუცუბიძის ქუჩის მოსახლეობა „სვეტს“ საცხოვრებელი კომპლექსის ასაშენებლად სხვა გზის გამოყენებას სთხოვს

ნუცუბიძის ქუჩის #127ბ მოსახლეობა სამშენებლო კომპანია „სვეტს“ საცხოვრებელი კომპლექსის ასაშენებლად სხვა გზის გამოყენებას სთხოვს. როგორც ნუცუბიძის ქუჩაზე მცხოვრებლებმა განმარტეს, კომპანია მშენებლობის პროცესში მძიმე ტექნიკის გადასაადგილებლად მათი ვიწრო ქუჩის გამოყენებას აპირებს, რაც დაუშვებელია. ისინი არ გამორიცხავენ, მშენებლობის პროცესში მწვანე ნარგავებიც დაზიანდეს, ამიტომ ითხოვენ, ახალ კორპუსებთან მისასვლელი ცალკე გზა გაკეთდეს. „ეს კორპუსები როცა აშენდა, აქ სანაგვე იყო. ეზოში გავლა იყო შეუძლებელი და ეს ტერიტორია საკუთარი ხარჯებით მოვაწესრიგეთ. ჩვენი კორპუსები ჯერ კიდევ ჩაუბარებელია, მაშინ „ქიდს არქიტექტურა“ ერქვა. მოგვიანებით, ხელმძღვანელებმა იგივე საიდენტიფიკაციო კოდით ახალი კომპანია „სვეტი“ გახსნეს და ახალი კორპუსების მშენებლობას აპირებენ. ეს გზა ჩვენ არ გვყოფნის და მისი გამტარობა საკმარისი არ იქნება ამდენი კორპუსისთვის“, - განაცხადა თინათინ უგულავამ. თუ კომპანია მათ მოთხოვნას არ გაითვალისიწნებს, მოსახლეობა სასამართლოში სარჩელის შეტანას არ გამორიცხავს.