თურქეთის მთავრობა უსაფრთხოების ზომებს ამკაცრებს

თურქეთის მთავრობა, ტერორიზმის საფრთხის გამო, უსაფრთხოების ზომებს ამკაცრებს. გადაწყვეტილება ანკარაში მას შემდეგ მიიღეს, რაც გერმანიის ხელისუფლებამ თურქული მხარე სტამბოლსა და ანკარაში მოსალოდნელი ტერორისტული აქტების შესახებ გააფრთხილა. პოტენციური თავდასხმების საშიშროების გამო, გერმანიამ თურქეთში დიპლომატიური მისიები დროებით დახურა. მუშაობა შეაჩერეს ანკარაში გერმანიის საელჩომ, სტამბოლში გერმანიის გენერალურმა საკონსულომ და ანკარაში მდებარე გერმანულმა სკოლამ. გერმანიის საგარეო საქმეთა სამინისტროს განმარტებით, არსებობს ინფორმაცია პოტენციური საფრთხეების შესახებ. დღესვე ცნობილი გახდა, რომ ანკარაში კვირას მომხდარ მასშტაბურ ტერაქტზე პასუხისმგებლობა რადიკალურმა სამხედრო დაჯგუფება „ქურთისტანის თავისუფლების ქორებმა“ აიღო. შესაბამისი განცხადება დაჯგუფების ვებგვერდზე გამოქვეყნდა. ქურთი რადიკალები ტექსტში თურქეთს ფაშისტურ ქვეყანას უწოდებენ და აღნიშნავენ, რომ ანკარაში მომხდარი ტერაქტი სამხრეთ-აღმოსავლეთით მდებარე ქურთებით დასახლებულ რაიონებში თურქეთის სამხედრო ოპერაციაზე პასუხი იყო.