გამოსახლებების წინააღმდეგ მებრძოლი მამისა ჯაფარაშვილი ძალადობრივად გამოასახლეს

მამისა ჯაფარაშვილი, რომელიც უკვე 10-ზე მეტი წელია იბრძვის გამოსახლებებისა და საბანკო- სამევახშეო სისტემის წინააღმდეგ, ხაშურში ძალადობრივად გამოასახლეს. ის უარს ამბობს მოლაპარაკებაზე, რადგან ბანკისთვის უკვე გადახდილი აქვს იმაზე 2-ჯერ მეტი (66 ათასი დოლარი), ვიდრე ისესხა(28 ათასი დოლარი). ამას გარდა, ბანკმა აუქციონის გზით საბაზრო ღირებულებაზე ბევრად დაბალ ფასად შეიძინა მისი ბინა და მიწის ფართობი (ერთად 17 ათას ლარამდე), რის შემდეგაც, ბანკის განცხადებით, მამისა ჯაფარაშვილს კიდევ გადასახდელი დარჩა იმდენი, რამდენიც თავდაპირველად ისესხა (დამატებით 28 ათასი დოლარი). დღევანდელი გამოსახლება უნდა შეფასდეს, როგორც სადამსჯელო ოპერაცია მათ წინააღმდეგ, ვინც საბანკო-სამევახშეო სისტემას ებრძვის, რადგან უკანასკნელი საცხოვრისიდან გამოასახლეს ადამიანი, რომელიც წლების განმავლობაში თავად ეხმარებოდა ათასობით მოქალაქეს სამევახშეო სისტემის მხილებასა და მასთან წინააღმდეგობაში. საქართველოს პარლამენტში გამოსახლებაზე მორატორიუმის გამოცხადების საკითხი 2014 წელს იყო დაყენებული. თუმცა, ბოლო მოსმენაზე, სხდომა პარლამენტში დამონტაჟებული ბომბის შესახებ შეტყობინების საფუძველზე ჩაიშალა, რასაც საკანონმდებლო ორგანოს ევაკუაცია მოყვა. შეგახსენებთ, რომ ამჟამად ათასობით ოჯახი კვლავ გამოსახლების მოლოდინშია. საზოგადოებისთვის ისევ უცნობია სამევახშეო ბაზრის რეალური მოცულობა და იმ კაპიტალის წარმომავლობა, რომელსაც მევახშეები საქართველოს მოსახლეობაზე აპროცენტებენ. გვიპოვეთ აქ: Facebook:   / mautskebeli.ge   Instagram:   / mautskebeli.  . Twitter:   / mautskebeli   Web: https://www.mautskebeli.ge/