0

''ჩვენ ვხედავთ, რომ ბიძინა ივანიშვილი ქვეყნის და რეგიონის მომავალს გეგმავს იმ ადამიანებთან ერთად ვინც სავარაუდოდ ბრალდებულია ბიუჯეტის არამიზნობრივ ხარჯვასა და კორუფციაში -ამის შესახებ ''ერთიანი ნაციონალური მოძრაობის'' წევრმა რეზო ხარაზმა ბრიფინგზე ისაუბრა. ''მაშინ როცა სახელმწიფო აუდიტის სამსახურმა 2016-2017 წლებში გამოაქვეყნა დასკვნა მილიონობით ლარის გაფლანგვისა და სახელმწიფოზე მიყენებულ ზიანზე, მაშინ, როცა პროკურატურამ ორი უმძიმესი მუხლით დაიწყო გამოძიება საავტომობილო გზების დეპარტამენტის ყოფილ მაღალჩინოსნებზე ამავდროულად კითხვითი ნიშნის ქვეშაა აჭარაში 200 მილიონი საბიუჯეტო თანხის გახარჯვის საკითხი''- განაცხადა რეზო ხარაზმა. ნაციონალური მოძრაობის წევრი ამბობს, რომ ოპოზიცია აქტიურად გააგრძელებს კორუფციული პროექტების გამოვლენას. ''რომ არა ივანიშვილის ინტერესები და კორუფციული საცეცები ვერც ჩიქოვანი და რომანაძე ვერ მოხვდებოდნენ ბიძინა ივანიშვილის გვერდით. მხოლოდ ''ქართულ ოცნებაში'' ივანიშვილის არაფორმალური მმართველობით არის შესაძლებელი მამას ასამართლებდე მძიმე კორუფციული ბრალდებით ხოლო შვილი გეჯდეს ე. წ პოლიტსაბჭოზე გვერდით და მას აბარებდე რეგიონის ბედს. ჩვენ კიდევ უფრო აქტიურად გავაგრძელებთ ბრძოლას ივანიშვილის კორუფციული პროექტების გამოსავლენად''- ამბობს #რეზო_ხარაზი