ხეთაშ ჯიხა

ხეთაშ ფეოდალური ეპოქაშ ჯიხა გედგჸ სოფელ ხამისკურს, სანაკი-ზუგიდიშ შოშეშ კვარჩხან მხარეს. ხობშე ხეთაშ ჯიხაშა 11 კილომეტრი რე. ხეთარეფი დო ხამსკურალეფი ათე ობიექტის ჯიხას უძახუნა. ისტორიაშ წყუეფი მუთუნს ვარაგადანს, მუჟამს დო მიქ გედგჸ ათე ჯიხა. ხეთაშ ჯიხა ოვალური ფორმაშ რე. დინახალენი ტერიტორია 4500 კვ. მეტრშახ იუჸაფუ. გალავანს დინახალეშე მედგუმილ რე სუმი ჯიხა-კოშკი, ნამუში სიმაღალე 8-10 მეტრაშა იუჸაფუ. კიდალაშ სისქა 2.5-3 მეტრა რე. ართი კოშკი მანგარო რე აკოციმილ. ჯიხაშ ოშენებელო გიმორინაფილ რე უმენტაშო კირქუეფ, ნამუსით ოხოლუ მოდიდო რეყეშ ჸურუმია ქუალეფით. ჯიხას მინაულარი ორუმე-ბჟადალშე უღუ. ორუმეშ განიშ კოშკის დიდი აკოცუმილ ლაგვანი დინოდგჸ, ათაქ კიდალეფს ასკილადირ რე სკვამას მოლასირი კირიშ ბათქაშეფი. ბჯადიოლუშ განიშ კოშკის 5 ლაგვანი დინოდგჸ. დინახალე ეზოს მიოხე უგუგებელი შენობებიშ ნოქურეფი, ნამუთ თხულენს არქეოლოგიურ საქვარეფს. ჯიხაშ უკახალე წყუ რე. გვიან შკა უკუნეფს ათე ჯიხას ნოხორუენა თავადი ქორთუეფი, ათენეფი ქორთული ისტორიაშ წყუეფს ქორთოძეეფო რენა მოშინაფილი. ხეთაშ ჯიხა მუშ ნაჭარეფს აფუ მოშინაფილი ვახუშტი პატონისკუას, რაფიელ ერისთავს, პარმენ ზაქარაიას, თამაზ ბერაძეს... ხეთაშ ჯიხა დაგურაფალი რე, საჭიროენს საკონსერვაციო დო სარესტავრაციო საქვარებს, ათეშ უკულ თენა გინირთუ საინტერესო ტურისტულ ობიექტო. ტექსტიშ ავტორ გოგიტა ჩიტაია #სამარგალო #მარგალურნინა #ხობი #ხეთა #საქართველო