ტანსაცმლის ექსპორტი შემცირდა, იმპორტი კი გაიზარდა - როგორ ვითარდება ადგილობრივი ინდუსტრია?

საქართველოდან ტანსაცმლის ექსპორტი კლებას განაგრძობს. მიმდინარე წლის იანვარ-ივლისის პერიოდში ქვეყნიდან 90,5 მლნ აშშ დოლარის ტრიკოტაჟის და სხვა სახის მანქანით ან ხელით ნაქსოვი ტანსაცმელი გავიდა. 2024 წლის ანალოგიურ პერიოდში კი, ეს მაჩვენებელი 113,9 მლნ აშშ დოლარი იყო.

საქართველოდან ტანსაცმლის იმპორტიორი მთავარი ქვეყანა კვლავ თურქეთია, სადაც წელს, 76,4 მლნ აშშ დოლარის პროდუქცია გავიდა, მეორე ადგილზე კი სომხეთია, სადაც 6,8 მლნ აშშ დოლარის ტანსაცმლის ექსპორტი განხორციელდა. მესამე და მეოთხე ადგილებს გაერთიანებული სამეფო (1,2 მლნ აშშ დოლარის) და ბულგარეთი (1 მლნ აშშ დოლარის) იკავებს. ხუთეულშია ასევე ისრაელიც 780 800 აშშ დოლარის ღირებულების ტანსაცმლის ექსპორტით.

ცნობისთვის, საქსტატის ინფორმაციით, მიმდინარე წლის ივლისში ტანსაცმლის წარმოების მოცულობის მაჩვენებელი შემცირებულია. ტანსაცმლის ექსპორტის კლების პარალელურად, იმპორტი რეკორდულ ნიშნულამდე გაიზარდა. საგარეო ვაჭრობის პორტალის თანახმად, მიმდინარე წლის პირველ შვიდ თვეში ქვეყანაში 210,2 მლნ აშშ დოლარის ტანსაცმელი შემოვიტანეთ, მაშინ როცა გასული წლის ანალოგიურ პერიოდში იმპორტმა 206,7 მლნ აშშ დოლარი შეადგინა. 2023 წლის იანვარ-ივლისში კი - 176,7 მლნ აშშ დოლარი. კიდევ უფრო ნაკლები იყო ტანსაცმლის იმპორტის მაჩვენებელი 2023 წლამდე.

რაც შეეხება იმპორტიორ ქვეყნებს, პირველ ადგილზე აქაც თურქეთია, საიდანაც წელს 62 მლნ აშშ დოლარის ტანსაცმელი შემოვიტანეთ. მეორე ადგილს ჩინეთი იკავებს 48,9 მლნ აშშ დოლარით, მესამეს - ესპანეთი (36,1 მლნ აშშ დოლარი), მეოთხეს - იტალია (19, 1 მლნ აშშ დოლარი), მეხუთეს კი - საფრანგეთი (5,6 მლნ აშშ დოლარი).

სტუმარი: გიორგი ჩემინავა - საქართველოს ტანსაცმლისა და მოდის ასოციაციის დირექტორი: